- विराटनगर विमानस्थल अपरान्ह साढे ४ बजेपछि मौसम खराबीका कारण बन्द गरिएको छ, भिजिविलिटी कम हुँदा समस्या भएको छ।
- श्रीएयरको विमान अवतरण गर्न नसकेर काठमाडौँ फर्किएको छ भने यति एयरको विमान झापा अवतरण गरेको छ।
- मौसम सुधार भएसँगै विमानस्थल पुनः सञ्चालन हुने जानकारीमा बुद्ध एयरका पाँच र यतिको चार उडान बाँकी छ।
विराटनगर- मौसममा आएको खराबीसँगै विराटनगर विमानस्थल बन्द गरिएको छ । नागरिक उड्डयन कार्यालय विराटनगरका अनुसार अपरान्ह साढे ४ बजेपछि मौसममा देखिएको खराबीसँगै विमानस्थल बन्द गरिएको हो ।
कार्यालय प्रमुख सुभाष झाका अनुसार विमानस्थलस्थित धावनमार्गमा भिजिविलिटी कम भएको छ । उनका अनुसार विमान उडानका लागि १ हजार ६ सय मिटर हुनुपर्नेमा हाल १ हजार मिटरमात्र रहेको छ ।
कार्यालय प्रमुख झाका अनुसार केही समयअघि काठमाडौँबाट आएको श्रीएयरको विमान अवतरण गर्न नसकेर पुनः काठमाडौँ फर्किएको छ ।
त्यसैगरि, यति एयरको विमानसमेत यहाँ अवतरण गर्न नसकेर झापाको भद्रपुर विमानस्थलमा अवतरण गरेको छ । कार्यालय प्रमुख झाले अपरान्ह करिब साढे चार बजेसम्म मौसम सफा रहेको र त्यसपछि वर्षा र बादल बाक्लिएपछि विमानस्थल बन्द गर्नु परेको बताए ।
उनले मौसममा सुधार आउने साथ विमानस्थल सुचारु हुने जानकारी दिए । कार्यालयका अनुसार हालसम्म बुद्ध एयरका चारवटा, यति एयरका ३ र श्री एयरलाइन्सको ३ वटा उडान भएको छ ।
कार्यालयका अनुसार बुद्ध एयरको थप पाँच वटा उडान तालिकामा रहेको छ । त्यसैगरि, यतिको ४ वटा र श्री एयरलाइन्सको ३ वटा उडान बाँकी रहेको छ ।
भर्खरै
लोकप्रिय
