देशभर मनसुन क्रमशः कमजोर हुँदै

काठमाडौँ- जल तथा मौसम विज्ञान विभागका अनुसार देशभर मनसुन क्रमशः कमजोर हुँदै गएको छ।

आज लुम्बिनी, कर्णाली र सुदूरपश्चिम प्रदेशका पश्चिमी भागका धेरै स्थानमा पश्चिमी वायुको प्रभाव रहनेछ भने गण्डकी प्रदेशका पश्चिमी भेगका केही स्थानमा प्रभाव पर्नेछ। बाँकी भूभागमा भने मनसुनी र स्थानीय वायुको प्रभाव कमजोर रहने विभागले जनाएको छ।

दिउँसो कोशी प्रदेशलगायत देशका पहाडी भूभागमा आंशिक बदली रहनेछ भने बाँकी भागमा मौसम मुख्यतया सफा रहनेछ। पहाडी भागका एक–दुई स्थानमा हल्का वर्षा पर्ने सम्भावना रहेको छ।

आज राति पनि कोशी, वाग्मती र गण्डकी प्रदेशका पहाडी भागमा आंशिक बदली रहने विभागले जनाएको छ। अन्य भूभागमा मौसम सफा रहने अपेक्षा गरिएको छ। यस क्रममा पहाडी भागका एक–दुई स्थानमा हल्का वर्षा हुन सक्ने सम्भावना विभागले जनाएको छ।