घोडाघोडी – कैलालीको घोडाघोडी-८ की अस्मिता थापाको अनुहार पीडाले थिचिएको छ। घर वरिपरी सन्नाटा छाएको छ। हाँसो गुञ्जिने आँगनमा अहिले रुवाबासी चलेको छ। शुक्रबार राति अस्मिताका श्रीमान् २८ वर्षीय केशर बुढाको घाँटी काटेर हत्या भएपछि उनलाई खपिनसक्नु भएको हो।
भारतमा मजदुरी गरी परिवार पाल्दै आएका बुढा आज भारतको गुजरात जाने तयारीमा थिए। शुक्रबार श्रीमतीसँग मिलेर आवश्यक सामग्री जुटाउने काम सकिएको थियो। ‘भोलि जान्छु, जुत्ता, लुगासहित आवश्यक सामग्रीको व्यवस्था गरौँ भनेर भन्नुभयो,’ रुँदै केशरकी श्रीमतीले भनिन्, ‘आज आफैँ कहिल्यै नफर्कने गरी हामीलाई छोडेर जानुभयो।’
शुक्रबार साँझ केशर रिचार्जकार्ड किनेर आउँछु भन्दै घरबाट निस्किएको बताउँदै अस्मिताले राति अबेरसम्म पनि केशर नफर्केपछि चिन्ता बढेको उल्लेख गरिन्। ‘केशर अबेर रातिसम्म पनि घर नआउँदा तनाब भए पनि फर्किनुहुन्छ भन्ने आशा थियो। समय घर्किँदै जाँदा केशर आएनन्, तर केशर जस्तै देखिने एक युवकको घाँटी रेटिएको अवस्थामा शव फेला परेको छ, भन्दै प्रहरी घरमा पुगे,’ उन भनिन्।
हत्या गरिएको शव केशरको नहोस् भनेर मनमा प्रार्थना गर्दै घटनास्थल पुगेको भन्दै अस्मिताले उक्त काटिएको शरीर केशरकै रहेको पुष्टि भएको बताइन्। ‘शव नजिक पुग्दा मेरो सारा संसार थामिएझैँ भयो। रिचार्जकार्ड किनेर फर्किहाल्छु भन्ने केशर अब कहिले नफर्कने गरी अस्ताइसकेका थिए। केशरले घर चलाउन भारतमा श्रम गर्ने गर्थे। तीन सन्तानको भविष्य उनको हातमा थियो,’ उनले भनिन्।
के थियो घटना ?
‘गएराति ११ बजेतिर केशरको हत्या गरी टाउको प्लास्टिकको झोलामा बोकेर १८ वर्षीय बलबहादुर विक र १९ वर्षीया गङ्गा बुढा क्षेत्री घोडाघोडी नगरपालिका–६ स्थित प्रतिखेतमा हिँडिरहेका थिए। अस्थायी प्रहरी पोस्टमा ड्युटीमा खटिएका कर्मचारीले उनीहरूलाई देखेर सोधपुछ गरेपछि बलबहादुर र गङ्गाले हत्या गरी टाउको बोकेर ल्याएको बताएका थिए। त्यसपछि इलाका प्रहरी कार्यालय सुखडमा खबर गरियो। खबर पाएलगत्तै इलाका प्रहरी कार्यालय सुखडबाट मेरो नेतृत्वमा प्रहरीको टोली घटनास्थल पुगेको हो,’ प्रमुख प्रहरी नायब उपरीक्षक रमेशदत्त अवस्थीले भने।
‘राति ११ बजेतिर खबर आयो ‘एकजनालाई मारियो’ भनेर। त्यसपछि हामी घटनास्थल पुग्याैँ,’ उनले भने।
अवस्थीका अनुसार टाउको एकातिर र शरीर एकातिर भएको अवस्थामा शव फेला परेकाले कसको हत्या भएको हो भन्ने थाहा पाउन सुरुमा समस्या भएको थियो। खोजी गर्दै जाँदा हत्या भएका व्यक्तिको मोबाइल फुटेको अवस्थामा फेला परेको जनाउँदै उनले भने, ‘फोन गर्दै जाँदा माइजू नाता पर्ने फेला पर्नुभयो।’
प्रहरी नायब उपरीक्षक अवस्थीले माइजू नाता पर्ने घटनास्थल पुगेपछि केशरको घरमा प्रहरी पुगेको जानकारी दिए। उनका अनुसार बिहान ३ बजेतिर मात्रै केशर बुढाको हत्या भएको हो भन्ने कुरा पत्ता लागेको थियो।
घटनाको कारण सामान्य विवाद रहेको अवस्थीले बताए। ‘हत्या गरिएका केशर र हत्या गर्नेहरूबीच चिनजान नै रहेनछ। रक्सी खाने क्रममा होटेलमा उनीहरूको भेट भएको थियो। सोधपुछका क्रममा विवाद हुँदा केशरले गालीगलाैज गरेपछि हत्या गरेको बलबहादुर र गङ्गाले बताएका छन्,’ उनले भने। पोस्टमार्टमका लागि शव टिकापुर पठाउने तयारी भइरहेको उनले जानकारी दिए।
यो घटनाले जरही गाउँमा त्रास फैलिएको छ। स्थानीयको भनाइअनुसार घरमा छोराछोरीलाई छाडेर यो गाउँका अधिकांश युवा रोजगारीका लागि भारत गएका छन्। अभिभावकविहीन अवस्थामा रहेका किशोरकिशोरीलाई सम्झाउने, बुझाउने कोही नहुँदा यस्ता घटनाको जोखिम हुने गरेको स्थानीय बताउँछन्।
होटेल सञ्चालक रत्न सिजालीले भने, ‘दुई वर्षअघि यो ठाउँमा बसाइँसराइ गरेर आएको हुँ, अहिले किन आएँ भन्ने भएको छ। यो मात्रै होइन, यहाँ अन्य घटना पनि भइरहन्छन्। हिजो घटना भएका युवा पनि मेरै होटलमा आएर रक्सी खाएका थिए। नदिँदा भने तोडफोड गर्देलान् भन्ने डर लाग्छ, दिँदा यस्ता घटना हुन्छन्।’
भर्खरै
लोकप्रिय
