सदरमुकाममा पनि टहरोमा पढ्छन् विद्यार्थी

सिमकोट – सिमकोट गाउँपालिका– ५ को बजार क्षेत्रमा रहेको बालमन्दिर माध्यमिक विद्यालयका विद्यार्थी काठको टहरोमा पढ्छन्। पुरानो विद्यालय भवन भत्काएपछि विद्यालयसँग अन्य विकल्प नहुँदा काठको टहरोमै जस्तापाता छाएर पठनपाठन सुरु गरिएको प्रधानाध्यापक कैलाश रोकायाले जानकारी दिए।

मावि स्तरको विद्यालयमा कक्षा तीन, चार, पाँच र ६ का सबै विषयको पठनपाठन काठको टहरोमा बुधबारबाट सुरु भएको हो। घटस्थापनापछि विद्यालयको पुरानो भवन भत्काइएको छ। पुरानै भवनको काठ र जस्तापाता विद्यालयसँग भए पनि टहरा तयार गर्न समय लागेकाले दसँै बिदापछि असोज २१ गतेबाट सुचारु हुनुपर्नेमा दुई दिन ढिलो गरी मात्र पढाइ सञ्चालन गर्नुपरेको हो। उक्त विद्यालयमा चार सयभन्दा बढी विद्यार्थी अध्ययन गर्छन्।