काठमाडौँ – नेपाली कांग्रेसको विद्यार्थी संगठन नेपाल विद्यार्थी संघले निवर्तमान प्रधानमन्त्री केपी शर्मा ओली र निवर्तमान गृहमन्त्री रमेश लेखकलाई तत्काल अनुसन्धानको दायरामा ल्याउन सरकारसँग माग गरेको छ।
सोमबार काठमाडौँमा पत्रकार सम्मेलन गरी संघका अध्यक्ष दुजाङ शेर्पाले जेन–जी आन्दोलनमा भएको मानवीय क्षतिको जिम्मेवारी तत्कालीन प्रधानमन्त्री ओली र गृहमन्त्री लेखकले लिनुपर्ने भएकाले उनीहरुमाथि अनुसन्धान गरी दोषी देखिएर कारबाही गर्न सरकारसँग माग गरेका हुन्।
उनले जेनजी आन्दोलनको पहिलो दिन भदौ २३ गते नै धेरै मानवीय क्षति भएकाले आफूहरुले सोही दिन नै तत्कालीन प्रधानमन्त्री ओली र गृहमन्त्री लेखकको राजीनामा मागेको बताए।
उनले सिंहदरबार जलाउनेलगायतका घटनाका विषयमा काठमाडौँ महानगरका मेयर बालेन शाहमाथि पनि अनुसन्धान गर्नुपर्ने बताए।
उनले भने, ‘तत्कालीन प्रधानमन्त्री र गृहमन्त्रीज्युलाई पनि छानबिनको दायरामा ल्याएर यदि दोषी देखियो भने उहाँहरुलाई पनि कारबाही गर्नुपर्छ र त्यो छानबिनको दायरामा काठमाडौँ महानगरपालिकाका प्रमुख बालेन्द्र शाह आउनुपर्छ।’
भर्खरै
लोकप्रिय
