काठमाडौँ – विश्वकप छनोटका लागि ओमानमा रहेको नेपालले आज कतारको सामना गर्दै छ।
आइसिसी टी-२० विश्वकपका लागि एसिया तथा इस्ट एसिया-प्यासिफिक छनोटमा प्रतिस्पर्धा गरिरहेको नेपालले सुपर सिक्सको पहिलो खेलमा युएईमाथि १ रनको रोमाञ्चक जित निकाल्दै लगातार दोस्रो पटक विश्वकप पुग्नका लागि बलियो दाबेदारी कायम राखेको थियो।
अब नेपाल कतारलाई हराएर थप सुरक्षित हुन चाहन्छ। खेल नेपाली समयअनुसार राति ८:४५ बजे सुरु हुनेछ।
नेपाल विश्वकपमा लगातार दोस्रो र समग्रमा तेस्रो पटक स्थान बनाउने प्रयासमा रहेको छ। गतिलो अलराउन्ड प्रदर्शन गरिरहेको नेपाललाई ‘अन्डर डग’को छवि बनाएको कतारविरुद्ध महत्वकांक्षीभन्दा पनि संयमित भएर खेल्नुपर्ने चुनौती रहनेछ।
नेपाल सुपर सिक्सको अंकतालिकामा ४ अंकसहित नेट रन रेटको आधारमा दोस्रो स्थानमा छ। पहिलो स्थानमा रहेको ओमानको पनि समान ४ अंक नै रहेको छ। सुपर सिक्समा कतारले ओमानसँगको पहिलो खेल हारेकाले विश्वकप छनोट सम्भावना कायम राख्न आज जित्नैपर्ने दबाब उसलाई रहेको छ।
समूह चरणमा कतार युएईसँग ७ विकेटले पराजित भएको थियो। अर्को खेलमा मलेसियालाई ८ विकेटले हराएर सुपर सिक्सको यात्रा तय गरेको थियो। तर, सुपर सिक्समा कतार ओमानसँग ३४ रनले पराजित भएर अंकविहीन रहेको छ।
नेपालले भने समूह चरणमा जापानलाई हराएर २ अङ्कसहित सुपर सिक्स पुगेको थियो। यस्तोमा युएईसँग रोमाञ्चक जितसहित अपराजित रहेर दाबेदारी प्रस्तुत गरिरहेको छ।
अहिलेसम्म नेपाल र कतारबीच ३ पटक टी-२० अन्तर्राष्ट्रियमा प्रतिस्पर्धा भएको छ। जसमा नेपालले २ खेल जित निकाल्दा अर्को एक खेलमा हार भोगेको छ।
भर्खरै
लोकप्रिय
