जनकपुरधाम – मधेस प्रदेशको मुख्यमन्त्रीमा लोकतान्त्रिक समाजवादी पार्टी (लोसपा) नेपालका प्रदेशसभा सदस्य जितेन्द्र प्रसाद सोनार (सोनल) नियुक्त भएका छन्।
प्रदेश प्रमुख सुमित्रा सुवेदी भण्डारीले नेपालको संविधानको धारा १६८ को उपधारा (२) बमोजिम सोनललाई नियुक्त गरेकी हुन्। सोनल ५ दलको ५६ जना प्रदेशसभा सदस्यको समर्थनमा मधेस प्रदेशको चौथो मुख्यमन्त्रीको रुपमा नियुक्त भएका हुन्।
मंगलबार अल्पमतमा रहेका मुख्यमन्त्री सतिशकुमार सिंहले पदबाट राजीनामा दिएपछि प्रदेश प्रमुख भण्डारीले बुधबार अपरान्ह ४ बजेसम्म दावी पेश गर्न समय दिएकी थिइन्। तर बुधबार मुख्यमन्त्रीमा दुई वटा दावी परेपछि ढिलो गरी सोनललाई नियुक्त गरिएको हो।
सोनललाई लोसपासहित जनता समाजवादी पार्टी (जसपा) नेपाल, जनमत पार्टी, माओवादी केन्द्र र नेकपा एकीकृत समाजवादी पार्टीले समर्थन गरेको हो।
यस्तै, दोस्रो दावी नेपाली कांग्रेसका संसदीय दलका नेता कृष्णप्रसाद यादवको नेतृत्वमा कांग्रेस, एमाले र जनमत पार्टीका संसदीय दलका नेता महेशप्रसाद यादवको हस्ताक्षरसहितको दावी पेश गरिएको थियो। तर जनमतका संसदीय दलका नेता उक्त पत्र गलत भएको भन्दै प्रदेश प्रमुखलाई आफूहरुको समर्थन सोनललाई रहेको भनेका थिए।
भर्खरै
लोकप्रिय
