- प्रधानमन्त्री सुशीला कार्कीले सहकारी पीडितहरूको समस्या समाधानका लागि उच्चस्तरीय बैठक आयोजना गरिन्।
- ठगी गरेर हिँड्नेलाई कानुन संशोधन गरी कारबाही गर्न प्रधानमन्त्रीले स्पष्ट निर्देशन दिइन्।
- सहकारी ठगीमा परेका प्रभावितको बचत फिर्ता सुनिश्चित गर्न घरजग्गा लिलाम गर्नुपर्ने बताइयो।
काठमाडौँ – प्रधानमन्त्री सुशीला कार्कीले सहकारी पीडितहरूको समस्या समाधानका लागि पहल लिएकी छिन्।
बिहीबार प्रधानमन्त्री तथा मन्त्रिपरिषद् कार्यालयमा सहकारी मन्त्री अनिल सिन्हा, सचिव केदारनाथ शर्मा, प्रधानमन्त्री कार्यालयका सचिव राजकुमार श्रेष्ठ, संकटग्रस्त समस्या समाधान समितिका अध्यक्ष, सहकारी नियमन प्राधिकरणका पदाधिकारी, सहकारी पीडित बचतकर्ता संरक्षण राष्ट्रिय महासंघका पदाधिकारीलाई राखेर प्रधानमन्त्री कार्कीले सिंहदरबारमा छलफल गरेकी हुन्।
छलफलका क्रममा प्रधानमन्त्री कार्कीले सहकारी ठगी गरेर हिँड्नेलाई कुनै हालतमा छाड्न नहुने बताउँदै त्यसै अनुसार अघि बढ्न निर्देशन दिइन्।
‘ठगेर खाएर हिँड्नेहरूलाई कुनै हालतमा छाड्न हुँदैन । यिनीहरू सुनका घडी लगाएर हिँड्छन् । महँगा गाडी चढेर हिँड्छन्। नक्कली डिभोर्स गराएर हिँड्छन् । उनीहरूलाई छाड्न मिल्दैन । बरु कानुनमा समस्या छ भने त्यो पनि संशोधन गरौं, प्रधानमन्त्री कार्कीले अगाडि भनिन्, ‘जे गर्नुपर्छ गरौँ तर ठगेर हिँड्नेलाई नछाडौँ, पीडितलाई रुँदै हिँड्नुपर्ने अवस्था अन्त्य गरौँ।’
सहकारी ठगीमा परेकाहरूको घरजग्गा नै लिलाम गरेर भए पनि पीडितको बचत फिर्ता हुनुपर्ने उनको भनाइ थियो।
‘अहिले नै गर्नुपर्छ । हामीले नै गर्नुपर्छ । यो सरकारको मुख्य काम नै चुनाव सम्पन्न गर्नु, भ्रष्टाचारमा कारबाही गर्नु र सहकारी समस्या समाधान गर्नु हो । यसैका लागि आएको हो, कार्कीले अगाडि भनिन्, ‘हामीले नगरे कसले गर्ने ? यही सरकारले गर्छ । पीडित चाहिँ सडकमा रोएर हिँड्ने, अनि जो ठग हो त्योचाहिँ सुकिलो मुकिलो भएर हिँड्ने । यस्तो हुनु हुँदैन।’
प्रधानमन्त्रीले भन्नुभयो, ‘यो सभ्य समाजको परिचय होइन । उनीहरूको घरजग्गा लिलाम गरेर हुन्छ कि, विदेशमा कोही छ भने पनि सम्पर्क गरेर अघि बढ्नुपर्छ।’
भर्खरै
लोकप्रिय
