झापा- ‘जेनजी आन्दोलन’का क्रममा इलाका प्रहरी कार्यालय दमकबाट लुटिएको एउटा गोली फेला परेको छ।
शुक्रबार बिहान १०:३० बजे दमक नगरपालिका वडा नं. ८, लक्ष्मी मार्गका ३८ वर्षीय कृष्णप्रसाद पाठकले बाटोमा बेवारिसे अवस्थामा एसएमजीको ९ एमएमको एक राउण्ड गोली फेला पारेका हुन्। उनले उक्त गोली इप्रका (इलाका प्रहरी कार्यालय) दमकमा ल्याई बुझाएका छन्।
यसैगरी, जेनजी आन्दोलनको क्रममा दमक प्रहरीको पोशाक लुटेर लगाई त्यसको दुरुपयोग गर्ने दमक वडा नं. २, भाङबारीका ३३ वर्षीय रोशन साउदेन लिम्बूलाई प्रहरीले पक्राउ गरेको छ। शुक्रबार दिउँसो ४ बजे लिम्बूलाई दमक वडा नं. ६, थाना रोडबाट नियन्त्रणमा लिई इप्रका दमकमा राखिएको छ।
साथै, सोही आन्दोलनको क्रममा प्रहरीको हतियार लुटेर लाने इलाम चुलाचुली वडा नं. ३, पेल्टीमारीका १९ वर्षीय सुजन राईलाई पनि दमक वडा नं. १, फाल्गुनन्दबाट प्रहरीले नियन्त्रणमा लिएको छ।
हतियार लुट्नेमध्ये एकजना यसअघि नै पक्राउ परिसकेका छन्। प्रहरी कार्यालयमा आक्रमण गर्ने र हतियार लुट्ने अन्य व्यक्तिको खोजी भइरहेको दमक प्रहरीले जनाएको छ।
भर्खरै
लोकप्रिय
