जेन–जी आन्दोलनको दुरुपयोग गर्दै लोकतान्त्रिक व्यवस्था र संविधानमाथि प्रहार गरियोः एमाले उपाध्यक्ष पौडेल
काठमाडौँ – नेकपा एमालेका उपाध्यक्ष विष्णुप्रसाद पौडेलले गत भदौ २३ र २४ गतेको जेन–जी आन्दोलनको दुरुपयोग गर्दै लोकतान्त्रिक व्यवस्था र संविधानमाथि प्रहार गर्ने काम भएको टिप्पणी गरेका छन्।
मंगलबार रुपन्देहीमा आयोजित एक कार्यक्रममा बोल्दै उनले सामाजिक सञ्जालमाथिको प्रतिबन्ध हटाउन जेन–जी पुस्ताले आन्दोलन गरेको भए पनि आन्दोलनको दुरुपयोग गरी सरकारविरुद्ध संगठित रुपमा प्रहार गर्ने काम भएको टिप्पणी गरे।
मुलुकलाई देशव्यापी रुपमा आक्रमण गरेर सरकार अपदस्थ गर्ने केही शक्ति समूहको योजना रहेको कुरा अन्ततः पुष्टि भएको उनको भनाइ छ।
उनले जेन–जी आन्दोलन सफल भइसकेपछि घुसपैठ गर्ने शक्तिहरुको कारण नयाँ बानेश्वर क्षेत्रमा गोली चलाउनुपर्ने स्थिति सिर्जना गरिएको जिकिर गरे।
‘माइतीघर मण्डलादेखि बानेश्वरका लागि प्रस्थान गरेको जुलुसका सन्दर्भमा जेनजी भाइहरुले हाम्रो आन्दोलन सफल भयो हामी फर्किउँ भनेका थिए। तर त्यहाँ अर्कै स्थिति सिर्जना गरेर कल्पना गरिएकोभन्दा बाहिरका घटना हुने अवस्था आयो। त्यसलाई सरकारले गम्भीर रुपमा लिएको थियो। तर, योजनाबद्ध ढंगले देशभर एकसाथ प्रहार गर्ने काम भएको छ। यो अन्दोलन व्यवस्था र संविधानका विरुद्धको षड्यन्त्र थियो,’ उनले भने।
उनले अन्तरिम सरकार निर्वाचनको तयारीमा नलागेको आरोप पनि लगाए। सरकारले निर्वाचनको तयारी नगरेर राजनीतिक दल र तिनका नेताहरूमाथि प्रतिशोधपूर्ण व्यवहार गरिरहेको पौडेलको आरोप छ।
भर्खरै
लोकप्रिय
