युएईविरुद्ध नेपालको धारिलो बलिङ

काठमाडौं- आईसिसी वर्ल्ड क्रिकेट लिग च्याम्पियनसिपअन्तर्गत सातौं चरणको आफ्नो दोस्रो खेलमा नेपालले युएईविरुद्ध धारिलो बलिङ गरेको छ।

पहिला ब्याटिङ गरेको युएईले २४.१ ओभरमा पाँच विकेट गुमाएर ५२ रन जोडेको छ । नेपालका सोमपाल कामी एक्लैले चार विकेट लिएका छन् ।

अर्को विकेट कप्तान पारस खड्काले लिएका छन्। युएईका कप्तान रोहन मुस्तफा आठ, विकेटकिपर घुलाम सब्बर शुन्य , रमिज सेहजाद तीन, मोहम्मद उसमान पाँच र असफाक अहमद चार रन जोडेर आउट भए।

युएईका मोहम्मद बुता १९ र अदनान मुफ्टी नौ रनमा खेलिरहेका छन्। यसअघि बुधबार युएईसँग भएको पहिलो खेलमा नेपाल सात विकेटले पराजित भएको थियो ।