काठमाडौँ- वाम एकताको खाका निर्माणमा सहमति खोज्न समायोजन समितिले मंगलबारबाट गति लिएको छ।
नेकपा एमाले अध्यक्ष केपी शर्मा ओली स्वास्थ्य परीक्षणका लागि बैंकक जानु भन्दा एक दिन पहिले वाम एकताको खाका निर्माणमा सहमति खोज्न पहिलो एकता समायोजना समितिको बैठक सुरु भएको छ।
ओली निवास बालकोटमा केहीबेर अघि सुरु बैठकमा एमालेका तर्फबाट अध्यक्ष ओली सहित झलनाथ खनाल, बामदेव गौतम, माधव नेपाल, ईश्वर पोखरेल र माओवादी केन्द्रका तर्फबाट अध्यक्ष पुष्पकमल दाहाल,नेता नारायणकाजी श्रेष्ठ ‘प्रकाश’ र रामबहादुर थापा ‘वादल’ सामेल छन्।
बैठकमा एकीकृत पार्टीका अध्यक्ष र सरकार प्रमुख छनौट, सत्ता साझेदारीका सर्त, एकिकृत पार्टीका सिद्धान्त र संरचना लगायतका एजेण्डामा छलपफल सुरु भएको माओवादीका नेता प्रकाशले देशसञ्चारसँग बताए। ओली र दाहालबीच तय भएअनुसार मंगलबार संमायोजन समितिको बैठक आह्वान गरिएको हो।
निर्वाचनपछि पार्टी एकता र सरकार गठनसँगसँगै जाने घोषण गरेका यी दुई दलको एकीकरण आआफ्नै अडानका कारण सुस्त बनेको छ।
वाम एकताका क्रममा केपी ओली प्रधानमन्त्री भएमा एकीकृत पार्टीको अध्यक्ष दाहाल हुनुपर्ने पूर्व अडानबाट माओवादी पछि नहट्ने देखिएको छ।
उसले ‘सम्मानजनक एकता’ हुनुपर्ने अडान नै दोहोर्याउने रणनीति बनाएको छ।
तर एमालेले भने प्रधानमन्त्री र एकीकृत पार्टीको अध्यक्ष एउटै हुनु पर्ने सर्त अघि सारेका कारण वाम एकता लम्बिएको छ।
पार्टी एकीकरणका लागि गठन भएको एकता संयोजन समितिको बैठक लामो समयसम्म पनि नबोलाइएकोमा दुवै दलका नेताहरुले असन्तुष्टि व्यक्त गर्दै आएका थिए।
यो पनि हेर्नुहोस्…
भर्खरै
लोकप्रिय
