कास्की- पुस ८ गते हत्या गरिएकी जनकपुर उपमहानगरपालिका-२, किशोर नगरीकी २२ वर्षीया रञ्जना शर्माको हत्यामा संलग्न आशंकामा प्रहरीले पोखराबाट तीन जनालाई पक्राउ गरेको छ।
पक्राउ पर्नेमा उनका श्रीमान् आनन्द मोहन शर्मा, जेठाजु अरविन्द ठाकुर र उनकी श्रीमति रिकुकुमारी शर्मा रहेका छन्।
उनीहरुलाई पोखराको अमरसिंह चोकबाट पक्राउ गरिएको हो। आनन्द मोहन पोखराको वन विज्ञान अध्ययन संस्थान मा कार्यरत छन् भने जेठाजु अमरसिंहचोकको वाणिज्य बैंकमा कार्यरत छन्।
मृतक रञ्जना शर्माका आफन्त प्रभादेवी ठाकुरले घटनामा संलग्न भएको भनी जिल्ला प्रहरी कार्यालय धनुषामा किटानी जाहेरी दिएकी थिइन्।
सोही पत्रको आधारमा कास्की जिल्ला प्रहरीले आरोपित ब्यक्तिहरुलाई पक्राउ गरेको जिल्ला प्रहरी कार्यालय कास्कीका प्रमुख अशोक सिंहले जानकारी दिए।
पक्राउ परेका तीनै जनालाई सोमबार नै धनुषा प्रहरीको जिम्मा लगाइएको सिंहले बताए। २२ वर्षीय रञ्जना शर्माका आफन्तले दाइजोका कारण उनको हत्या भएको दाबी गर्दै आएको छ।
यसअघि धनुषा जिल्ला अदालतले रञ्जनाका ससुरा ६२ वर्षीय देवनारायण ठाकुरलाई पूर्वपक्षका लागि कारागार चलान गरिसकेको छ।
भर्खरै
लोकप्रिय
