काँकरभिट्टा- नेपालका पहाडी जिल्लाहरुमा उत्पादित अदुवा आइतबार साँझसम्म पनि भारत निर्यात हुन सकेको छैन। दुई दिन अघि नेपाली अदुवा भारत निकासी खुल्यो भनेर वाणिज्य मन्त्रालयका अधिकारीहरुले भनिरहँदा आइतबार साँझसम्म पनि नेपाली अदुवा भारत जान नसकेको नेपाल अदुवा उत्पादन तथा व्यवसायी संघका केन्द्रीय अध्यक्ष नरेन्द्रकुमार खड्काले बताए।
आइतबार भारत लैजानका लागि ६ ट्रक अदुवा मेची भन्सार कार्यालय काँकरभिट्टाको परिसरमा राखिएको थियो। तर अदुवा लोड गरेका ट्रक भन्सार कार्यालयबाट फिर्ता आएको खड्काले बताए।
उनले भने, ‘हामीले सरकारी अधिकारीहरुको भनाइलाई आधार मानेर अदुवा ट्रकमा लोड गर्यौं। तर आइतबारसाँझसम्म पनि अदुवा गएन। भारतले अहिलेसम्म अदुवा खोलेको छैन।’
भारतले माटोसहितको अदुवामा पटक पटक रोक लगाएको थियो। अहिले नेपाली क्वारेन्टाइनले नै माटो भएको अदुवालाई भारत लैजान रोक लगाएको छ। तर प्रशोधित अदुवा पनि अहिले भारत निकासी हुन नसकेको खड्काले जानकारी दिए ।
भारतले भारतीय व्यापारीहरुकै लागि तोकेको मापदण्डका कारण पनि अहिले अदुवा भारत जान नसकेको नेपाल अदुवा उत्पादन तथा व्यवसायी संघका सचिव हेमन्तराज बोहराले बताए।
भारतीय व्यापारीहरुले पहिला नै आयात गरिने मात्रा निर्धारण गरेर त्यस्मा लाग्ने कर पहिला नै तिर्नुपर्ने भएकाले नेपाली अदुवा गोदाम तथा किसानका घरमा थन्क्याउनु परेको उनको भनाइ छ।
भारतीय व्यापारीहरुले भारतीय सरकारले तोकेको मापदण्ड पूरा नगरेकाले अहिले नेपाली अदुवा भारत जान नसकेको हो।
तर प्रशोधित अदुवा बंगलादेश पठाइराखिएको नेपाल अदुवा उत्पादक तथा व्यवसायी संघका अध्यक्ष खड्काले बताए।
खड्काले चालुआर्थिक बर्षमा भारतमा सात सय देखि आठ सय गाडी अदुवा निर्यात हुँदा बंगलादेश तर्फ करिब ३० ट्रक अदुवा निर्यात गरिएको बताए।
उनले युरोपेली मुलुकहरुमा अदुवा व्यापार संभावनाको खोजी भइरहेको जानकारी दिएका छन्।
सम्बन्धित समाचार
भर्खरै
लोकप्रिय
