सुर्खेत – राष्ट्रियसभा निर्वाचनमा स्थानीय तहका जनप्रतिनिधिले दिएको मध्ये धेरै मत बदर भएको छ । बुधबार निर्वाचन भएको प्रदेश नम्बर ६ मा प्रदेशसभा सदस्यको भन्दा स्थानीय तहका प्रमुख/उपप्रमुखका धेरै मत बदर भएका हुन् ।
मुख्य निर्वाचन अधिकृतको कार्यालयका अनुसार १६ वटा मत बदर भएका छन् । प्रदेशसभा तर्फ ४० र स्थानीय तह तर्फका एक सय ५८ गरी जम्मा एक सय ९८ मत खसेको थियो । जसमध्ये स्थानीय तहका प्रमुख र उपप्रमुखका र प्रदेशसभा सदस्यका गरी १६ मत बदर भएको निर्वाचन अधिकृतको कार्यालयले जनाएको छ ।
एक मत बराबर १८ मतभार भएको स्थानीय तहका प्रमुख/उपप्रमुखका १३ मत बदर भएका छन् । बदर मत अनुसार दुई सय ३४ मतभार बदर भएको निर्वाचन अधिकृत मेदिनीप्रसाद पौडेलले बताए । यस्तै प्रदेशसभा सदस्यहरुले तीन मत बदर भएका छन् । एक मत बराबर ४८ मतभार भएको प्रदेशसभामा एक सय ४४ मत बदर भएका हुन् ।
बहुमतीय मतदान प्रर्णालीमा धेरैजसो मत बदर भएको मुख्य निर्वाचन अधिकृत पौडेलले बताए । जसअनुसार दलित र अल्पसंख्यक कोटाका धेरै मत बदर भएका हुन् । उनका अनुसार दलित कोटामा जनप्रतिनिधिका ६ र प्रदेशसभा सदस्यको एक मत बदर भएको छ । यस्तै अपाङ्ग सदस्यका लागि प्रदेशसभा सदस्यको एक मत बदर भएको छ ।
मुख्य निर्वाचन अधिकृत पौडेलले चिन्ह लगाउनुपर्ने मतपत्रमा अंक लेखिएकाले धेरै मत बदर भएको बताए । यस्तै एकल संक्रमणीय मतदान प्रर्णाली अन्तर्गत अंक लेख्दा क्रम नमिलाएरै लेखिएको पाइएको छ ।
‘एकल संक्रमणियमा मतपत्रमा अंक लेख्दा एक नलेखि दुई/तीन लेखिएको पाइयो । उनले भने, ‘कतै चिन्ह पनि लगाइएको छ । मतदाता शिक्षाको अभाव भन्दा मतपत्रको ख्याल नगर्दा मत बदर भएको हो ।’
राष्ट्रियसभा सदस्य निर्वाचनमा प्रदेश ६ को अन्तिम मत परिणाम सार्वजनिक भएको छ । निर्वाचन अधिकृतको कार्यालयले सार्वजनिक गरेको मतपरिणाम अनुसार आठ पदमा वाम गठबन्धनका उम्मेदवार विजयी भएका छन् ।
विजयी हुनेमा दलिततर्फ एमालेका नरपति लोवार विजयी भएका छन् । उनले तीन हजार ६ सय ६६ मत ल्याएर हुन् । उनका प्रतिस्पर्धी कांग्रेसका मित्रलाल सार्की ९ सय ६० मत ल्याएर पराजित भएका छन् । यस्तै अपांगता पदमा पनि वाम गठबन्धनकै जीवन बुढा विजयी भएका छन् ।
माओवादी केन्द्रबाट उम्मेदवारी दिएका उनले तीन हजार सात सय २० मत प्राप्त गरे । उनका निकटतम प्रतिस्पर्धी कांग्रेसका गोपालप्रसाद शर्माले ९ सय ७८ मत प्राप्त गरे। यस्तै एमालेबाट महिला सदस्यमा कविता बोगटी, नन्दा शर्मा विजयी भएकी छन् ।
खुल्ला सदस्यमा एमालेका भैरवसुन्दर श्रेष्ठ र ठगेन्द्र प्रकाश पुरी विजयी भएका छन् । माओवादी केन्द्रबाट अल्प्संख्यकमा माओवादी युटोल तामाङ्ग र खुल्ला सदस्यमा कालीबहादुर मल्ल विजयी भएका छन् ।
भर्खरै
लोकप्रिय
