सुर्खेत– कर्णाली प्रदेशको स्थायी राजधानी तोकिएको छ। अन्य प्रदेशमा राजधानीको विषय निकै पेचिलो बनिरहेका बेला शनिबार बसेको चौथो प्रदेशसभा बैठकले सर्वसम्मत रूपमा तोकिएको हो।
संवैधानिक प्रावधानअनुसार प्रदेशसभाको दुई तिहाइ बहुमतले सुर्खेतको वीरेन्द्रनगरलाई राजधानी तोकेको हो।
बैठकमा कांग्रेस संसदीय दलका नेता जीवनबहादुर शाहीले प्रदेश ६ को स्थायी राजधानी सुर्खेतको वीरेन्द्रनगरलाई बनाउन प्रस्ताव पेश गरेका थिए।
प्रस्ताव पेश गर्दै उनले भौगोलिक हिसावले केन्द्रमा नभएपनि भौतिक रुपमा अव्वल भएकाले सुर्खेतको वीरेन्द्रनगर नै प्रदेशको राजधानी हुनुपर्ने बताए।
शाहीको प्रस्तावमा समर्थन गर्दै एमालेका गुलावजंग शाहले सातै प्रदेशमा कान्छो प्रदेश कर्णाली प्रदेशले नेतृत्वदायी भुमिका खेल्नुपर्ने बताए। विकासका गतिले उत्कृष्ट क्षेत्र वीरेन्द्रनगर भएकाले नमुना राजधानी बनाउन सकिने बताए। माओवादी केन्द्रका सांसद गणेशप्रसाद सिंह र राप्रपाका शोसीला शाहीले समर्थन जनाएका थिए।
प्रस्ताव माथि सांसद यज्ञराज विसी, धर्मराज रेग्मी, कुर्मराज शाही, विनदमान विष्ट, देवी वली, ठम्मरबहादुर विष्टले भनाई राखेका थिए।
सांसदहरुले बोलेपछि प्रदेशका सभामुख राजबहादुर शाहीले मत विभाजनका लागि आग्रह गरेका थिए।
प्रदेशसभाको प्रतिनिधित्व गर्ने सदस्यहरुको दुइतिहाइले मत विभाजनबाट राजधानीको टुङ्गो लगाइएको हो। मतविभाजनका क्रममा प्रदेश राजधानी वीरेन्द्रनगर हुने पक्षमा ६३ मत परेको थियो भने एक मत विपक्षमा परेको थियो । फागुन १५ गते मंगलबार सम्मका लागि प्रदेशसभा बैठक स्थगित गरिएको छ।
भर्खरै
लोकप्रिय
