सुर्खेत – कर्णाली प्रदेश सरकारले कर्णाली रारा पर्यटन वर्ष २०७५ को उद्घाटन कार्यक्रमका लागि बजेट बिनियोजन गरेको छ । कर्णाली प्रदेशको चौथो मन्त्रीपरिषद बैठकले पर्यटन वर्ष उद्घाटन कार्यक्रमका लागि ३९ लाख बजेट बिनियोजन गरेको हो ।
त्यसैगरी कर्णाली प्रदेश सरकारको रारामा बस्ने मन्त्रीपरिषद बैठकको एजेण्डा पनि तय गरेको भूमि व्यवस्था तथा कृषि सहकारी मन्त्री एवं सरकारकी प्रवक्ता विमला केसीले जानकारी दिइन् ।
बैठकले पर्यटन वर्ष उद्घाटन कार्यक्रमको व्यवस्थापकीय तथा प्राविधिक तयारी सम्बन्धी आवश्यक निर्णय गरेको प्रवक्ता केसीले बताइन् ।
बैठकले प्रधानमन्त्री कार्यालयबाट प्राप्त प्रधानमन्त्रीको कार्यतालिकामा मौसमका कारण आवश्यक परिमार्जनका लागि अनुरोध गर्ने निर्णयसमेत गरेको छ ।
आगामी वैशाख १ गतेको मुगुको रारा ताल परिषदबाट प्रधानमन्त्री केपी शर्मा वलीले कर्णाली–रारा पर्यटन वर्ष–२०७५ को उद्घाटन गर्नेछन् ।
उक्त कार्यक्रमको उद्घाटन सँगै प्रधानमन्त्रीले राष्ट्रका नाममा सम्वोधन गर्ने कार्य तालिका रहेको छ ।
प्रधानमन्त्री वलीको अध्यक्षतामा कर्णाली प्रदेश सरकारको मन्त्रीपरिषद्को बैठक समेत रारामा बस्ने कार्यतालिका छ । कर्णाली–रारा पर्यटन वर्ष–२०७५ को सम्पुर्ण तयारी पूरा भएको कर्णाली प्रदेश सरकारले जनाएको छ ।
कार्यक्रम लक्षित गरी सडकको सुधार, होटेल व्यवस्थापन, कार्यक्रम स्थलमा आवश्यक प्रविधि जडानलगायतको सम्पूर्ण तयारी पूरा भएको हो ।
दैनिक एक हजार पर्यटकहरु कर्णाली भित्राउने उद्देश्यले सरकारले पर्यटन वर्ष घोषणा गरेको हो । आगामी वर्षभरि पर्यटकीय सम्पदाको प्रचार–प्रसार गर्न विभिन्न कार्यक्रमहरु सञ्चालन गरिने सरकारले योजना बनाएको छ ।
भर्खरै
लोकप्रिय
