विर्तामोड- नेकपा एमालेका वरिष्ठ नेता तथा पूर्व प्रधानमन्त्री झलनाथ खनालले नेपालको गन्तव्य समाजवाद भएको बताएका छन्।
मंगलबार झापाको विर्तामोडमा रुद्र–गौरी, श्री–अम्बिका ओली प्रतिष्ठानद्वारा आयोजित पुरस्कार वितरण कार्यक्रममा बोल्दै नेपालको संविधानले समाजवादको बाटो देखाएकाले समाजवादतर्फ नगई सुख नभएको नेता खनालले बताए।
उनले भने, ‘नेपालको संविधानले चार वटा बाटा देखाएको छ। लोकतन्त्र, देशभक्ति, प्रगति र समाजवाद अबको बाटो हो।’
अहिले सिंगो विश्वका देशहरुको गन्तव्य समाजवाद भए पनि कतिपय देशहरुले समाजवाद भन्न नसकेको नेता खनालको भनाइ थियो। उनले भने, ‘तर नेपालमा समाजवाद के हो भन्ने विषयमा चर्चा शुरु भइसकेको छ। त्यही हो हाम्रो गन्तव्य।’
विभिन्न विधाका पुरस्कार वितरण
रुद्र–गौरी, श्री–अम्बिका ओली प्रतिष्ठान झापाद्वारा यस वर्षको ‘रुद्रप्रसाद ओली स्मृति राष्ट्रिय कृषि पुरस्कार’ बैतडीका वैज्ञानिक मदनराज भट्टलाई प्रदान गरिएको छ। उक्त पुरस्कारको राशि रु एक लाख एक हजार १११ रहेको छ।
तीन दशकसम्म राष्ट्रिय गहुँ बाली अनुसन्धान कार्यक्रमको मुख्य प्रयोजनकर्ता तथा संयोजकका रुपमा कार्यरत रही गहुँ बालीको विभिन्न जातको विकास गरी कृषि अनुसन्धान तथा प्रविधि प्रशारण कार्यमा उत्कृष्ट योगदान पुर्याएको भन्दै उनलाई सो पुरस्कार प्रदान गरिएको हो।
त्यस्तै यस वर्षको रु एक लाख एक हजार १११ राशिको ‘गौरादेवी ओली स्मृति राष्ट्रिय आदर्श आमा पुरस्कार’ बालकुमारी जिसीलाई प्रदान गरिने छ। वैदेशिक रोजगारीलाई सुरक्षित बनाउनका लागि सूचना प्रवाह तथा जोखिमस्थितिबाट महिलाको सशक्तिकरण, उद्धार तथा पुनःस्थापनामा उल्लेखनीय योगदान पुर्याएवापत नवलपरासी निवासी जिसीलाई सो पुरस्कार प्रदान गरिएको प्रतिष्ठानका अध्यक्ष गंगाप्रसाद ओलीले बताए।
रु एक लाख एक हजार १११ राशिकै ‘अम्बिकादेवी ओली स्मृति राष्ट्रिय साहित्य तथा पत्रकारिता पुरस्कार’ यस वर्ष साहित्यकार मेघराज मञ्जुललाई गरिएको छ। सामाजिक चेतना अभिवृद्धिलाई अभियानका रुपमा सञ्चालन गर्दै साहित्यको क्षेत्रमा उल्लेखनीय योगदान पुर्याए वापत मञ्जुललाई सो पुरस्कार प्रदान गरिएको हो।
त्यस्तै यस वर्षको रु ५१ हजार १११ राशिको ‘देवी ओली स्मृति राष्ट्रिय वाल पुरस्कार’ सामाजिक क्षेत्रमा क्रियाशील संस्था सिबिआर भक्तपुरलाई प्रदान गरिएको छ। अपाङ्गताको रोकथाम, उपचार तथा पुनःस्थापनामा २०४२ सालदेखि निरन्तर रुपमा लागिपरेर बालबालिकाको हित अधिकार तथा सम्मानयुक्त जीवनयापनका लागि संस्थाले योगदान पुर्याएको भन्दै उक्त संस्थालाई सो पुरस्कारबाट सम्मान गरिएको ओलीले बताए।
भर्खरै
लोकप्रिय
