पोखरा – प्रदेश ४ सरकारले यो चालु आर्थिक वर्षको बाँकी अवधिका लागि ल्याएको बजेट दुई तिहाई बहुमतले पारित गरेको छ । प्रतिपक्ष दलको अवरोधले दुई दिन ढिला भए पनि आइतबार बेलुका दुई तिहाई बहुमतका साथ बजेट पारित भएको हो ।
अर्थमन्त्री किरण गुरुङले १९ गते १ अर्ब २ करोड ५ लाख रुपैयाँको बजेट संसदमा पेश गरेका थिए । एमाले, माओवादी र जनमोर्चाले बजेटको पक्षमा मत दिए भने नेपाली कांग्रेस र नयाँ शक्तिले बजेटको विपक्षीमा मत दिएका थिए ।
प्रतिपक्षी दल कांग्रेस र नयाँ शक्तिले प्रतिपक्षको आवाज सुनुवाइ नभएको र एकतर्फि विकास भन्दा कार्यकर्ता पोस्नेखालको बजेट ल्याएको आरोप लगाउँदै संसद अवरुद्ध गरेका थिए ।
कांग्रेस संसदीय दलका नेता कृष्णचन्द्र नेपालीले प्रतिपक्षको विचारलाई सम्बोधन नगरी एकतर्फी आफूखुशी बजेट ल्याइएकाले बाध्य भएर अवरोध गर्नुपरेकोे बताए । उनले २०७५/२०७६ को बजेट तर्जुमा गर्न २५ लाख रुपैयाँ विनियोजन वैज्ञानिक नभएको भन्दै प्रश्न उठाएका थिए ।
जवाफमा मन्त्रीले कार्यविधि र नियमविपरीत १ रुपैया पनि तलमाथि नहुने बताए । उनले विरोधका लागि मात्रै विरोध नगरी जिम्मेवार प्रतिपक्ष बन्न आग्रह गरे ।
अर्थमन्त्री गुरुङ्गले प्रतिपक्षलाई सदनको मर्यादामा भित्र रहेर आफ्नो कुरा राख्न आग्रह गरेका थिए । उनले भने ‘सदन भनेको प्रतिपक्षको हो । सत्ता पक्षकालागि त सरकार छ नि । सदनको मर्यादालाई ध्यान दिएर आफ्नो कुरा राख्नुस् ।’
भर्खरै
लोकप्रिय
