पोखरा- असार ९ गतेदेखि बेपत्ता पोखरा महानगरपालिकाकाे सामाजिक महाशाखाका वरिष्ठ सूचना अधिकृत ओमराज पौडेलको २१ दिनपछि शव फेला परेको छ ।
शनिबार बिहान तनहुँको भिमादबाट उनको शव फेला परेको प्रहरीले जानकारी दिएको छ । भिमाद नगरपालिका वडा नं ६ स्थित सेती नदीमा तैरिरहेको अवस्थामा पौडेलको शव भेटिएको हो ।
असार ९ गते बिहान घरबाट हिँडेका पौडेलले महेन्द्र पुलस्थित सेती नदीमा हाम फालेको प्रहरीले निष्कर्ष निकालेको थियो । हराइरहेका पौडेल २१ दिनपछि मृत भेटिएका हुन् ।
पौडेलको शवलाई सेती नदी किनारमा तैरिरहेको अवस्थामा स्थानीयवासीले देखेपछि प्रहरीमा खबर गरेका थिए।
पौडेल हराएको लामो समय बितिसकेकाले शव गलेको अवस्थामा भेटिएको प्रहरीले जनाएको छ । पौडेलले ‘घरमा परिवारको लागि केही गर्न सकिन’ भनेर लेखेर छाडेको परिवारले जनाएको छ ।
उनको शवलाई आफन्तले पहिचान गरेपछि पोष्टमार्टका लागि पश्चिमाञ्चल क्षेत्रिय अस्पतालमा लगिएको छ।
पौडेलले घर छाडनु अघि एउटा पत्र लेखेर छोडेका थिए । पत्रमा लेखिएको थियो ‘कठै उर्मिला, तिमिले यति धेरै माया दिँदा पनि जीवनभर साथ दिन सकिनँ । ३ वटा कोपिला तिम्रो जिम्मामा छाडेर जाँदैछु । राम्रोसँग बसे चारै जना । अलविदा ।’
भर्खरै
लोकप्रिय
