काठमाडौँ – चिकित्सा शिक्षामा सुधारको माग गर्दै लामो समयदेखि आन्दोलनमा रहेका डा. गोविन्द केसी पछिल्लोपटक अनशन बसेको आइतबार २३ दिन भएको छ ।
संसदमा पेश भएको चिकित्सा शिक्षा विधेयकमा माथेमा आयोग अनुसार तयार भएको अध्यादेशको भावना तोडमोड गरिएको विरोधमा डा. केसीले यसपटक सत्याग्रह सुरु गरेका हुन् ।
उनले २३ दिनअघि जुम्ला पुगेर अनशन सुरु गरेका थिए । तर स्वास्थ्य अवस्था बिग्रिँदै गएपछि सरकारले जोडबल गरेर डा. केसीलाई गएको बिहीबार काठमाडौँ ल्याएको हो । उनी अहिले त्रिवि शिक्षण अस्पतालमा अनशनमा छन् ।
उनको मागको पक्ष र आन्दोलनको समर्थन तथा जीवन रक्षाका लागि नागरिक समाजका अगुवा तथा समाजका प्रवुद्ध समूह पनि आन्दोलनमा छन् । दैनिकजसो डा. केसीको समर्थन तथा माग पूरा गराउनका लागि दबाब दिने उद्देश्यले काठमाडाैँसहितका ठाउँमा प्रदर्शन हुने गरेका छन् ।
डा. केसीले यसअघि १४ पटक अनशन बसिसकेका छन् । डा. केसी १५ औँ पटकको अनशनमा रहँदा पनि उनका माग लगभग उस्तै छन् । तर पूरा गराउने पक्षमा सहमति हुँदै त्यसको कार्यान्वयन नहुँदै आएको छ ।
यसअघिका अनशनमा डा. केसीले २३ दिनभन्दा बढी कटाएका छैनन् । तर यो पटक भने उनको सत्याग्रह लामो हुने देखिएको छ । उनका माग पूरा गराउने र अनशन तोडाउने पहल त्यति गतिलो वा भनौँ प्रभावकारी देखिएको छैन ।
सरकार उनका मागमा गम्भीर नभएको आरोप लाग्ने गरेको छ । यसले गर्दा डा. केसीको यो पटकको सत्याग्रह यसअघिका भन्दा लामो हुने देखिएको छ ।
आइतबार दिनभरमा ‘ब्रेक–थ्रु’ भएन भने डा. केसीको आन्दोलन अहिलेसम्मकै लामो हुनेछ । यसको अर्थ उनको स्वास्थ्यमा देखिने जतिलता पनि पक्कै गम्भीर बन्दै जानेछ ।
भर्खरै
लोकप्रिय
