पोखरा – प्रदेश सांसद बिन्दुकुमार थापा र प्रतिष्ठित व्यवसायी कालु गुरुङलाई धम्क्याएर करोडौँ रकम असुल्न प्रयास गर्ने ४ जनालाई जिल्ला अदालत कास्कीले जेल सजाय सुनाएको छ ।
गत माघमा पक्राउ परेका ४ मध्ये २ जनालाई ५ वर्ष कैद र ५० हजार रुपैयाँ जरिवाना र २ जनालाई ४ वर्ष कैद र ५० हजार रुपैयाँ जरिवानाको फैसला अदालतले सुनाएको हो ।
न्यायाधीश काजीबहादुर राईको इजलासले मुख्य योजनाकार शंकर भन्ने नलबहादुर गुरुङ, विवश थापा भनिने अमृत खड्कालाई ५÷५ वर्ष कैद सजाय सुनाएको श्रेस्तेदार जगन्नाथ पौडेलले जानकारी दिए ।
सो घटनामा सहयोग गर्ने शिव कार्की र राम सुवेदीलाई ४/४ वर्ष कैद सुनाइएको छ । गत माघमा पक्राउ परेका उनीहरु जिल्ला अदालतको आदेशले पुर्पक्षका लागि थुनामा थिए ।
उनीहरु चारैजनाविरुद्ध अपहरण तथा शरीर बन्धक उद्योग तथा संगठित अपराधको मुद्दा थियो । उनीहरुले गत पुसदेखि लगातार १ महिनासम्म सांसद थापा र व्यवसायी गुरुङलाई नेपाल र भारतका मोबाइल नम्बरबाट फोन गरी करोडौँ रकम माग गरेका थिए । उनीहरुलाई कास्की प्रहरीले गएको माघ १८ मा पोखराबाटै पक्रेको हो ।
उक्त गिरोहले कालु गुरुङसँग १० करोड र बिन्दु थापासँग २ करोड रुपैयाँ मागेको थियो । एक महिनाभन्दा बढी समयको अनुसन्धानपछि कास्की प्रहरीको विशेष टोलीले गिरोहलाई नियन्त्रणमा लिन सफल भएको थियो ।
उनीहरु पक्राउ परेलगत्तै सांसद थापा र व्यवसायी गुरुङले जिल्ला प्रहरी कार्यालय कास्कीमा किटानी जाहेरी दिएका थिए ।
भर्खरै
लोकप्रिय
