विर्तामोड – चिया मजदुरले असोज १० गतेदेखि सबै चिया बगान र प्रशोधन कारखाना बन्द गर्ने घोषणा गरेका छन् ।
श्रम ऐनले तोके अनुसारको न्युनतम् ज्याला नपाएको भन्दै चरणवद्ध सङ्घर्षमा उत्रिएका मजदुरले चिया बगान र कारखाना बन्दको घोषणा गरेका हुन् । सरकारले चिया बगानमा कार्यरत मजदुरको न्युनतम् ज्याला ३ सय ८५ रुपैयाँ तोकेको छ ।
बिहीबार विर्तामोडमा पत्रकार सम्मेलन गरी मजदुर सङ्गठनका नेतृत्वले न्युनतम् ज्याला कार्यान्वयनका लागि सात दिनको अल्टिमेटम दिइएको बताए ।
मजदुर नेता भूपाल सापकोटाले सरकारले तोके अनुसारको ज्याला नपाएपछि बाध्य भएर कारखाना बन्द गर्ने निष्कर्षमा पुगेको बताए ।
नेपाल कृषि तथा बगान क्षेत्र श्रमिक सङ्घका उपाध्यक्ष सहीकुमार राईले दसैँको मुखमा पनि मजदुरको आन्दोलन नरोकिने बताए ।
नेपाल चिया बगान श्रमिक सङ्घका अध्यक्ष दीपक तामाङले मजदूरलाई ज्याला नदिने चिया उद्योगीलाई सरकारले जेल हाल्नु पर्ने जिकीर गरे ।
भर्खरै
लोकप्रिय
