पोखरा – कास्की नेपालको सबैभन्दा बढी गर्भपतन हुने जिल्ला रुपमा रहेको एक अध्ययनले देखाएको छ ।
विभिन्न संघ संस्थाले गरेको अध्ययन तथा अनुसन्धानले गण्डकी प्रदेशलाई बढी गर्भपतन हुने प्रदेशको रुपमा देखाएको छ भने त्यसमा पनि कास्की जिल्लामा ८५ प्रतिशत बढि गर्भपतन हुने गरेको तथ्यांकले देखाएको हो ।
परिवार नियोजन संघ कास्कीका प्रमुख सन्तोष अधिकारीका अनुसार गर्भपतन गर्नकालागि कास्कीमा मात्रै ४० वटा स्वास्थ्य संस्था छन् । उनले गर्भपतनका लागि शहरका महिलाहरु बढि हुने गरेको बताए ।
उनले भने, ‘कास्कीका बजार क्षेत्रकै मात्रै ८३ प्रतिशतभन्दा बढी सेवाग्राही छन् । बाँकीमात्रै गाउँका महिला सेवा लिन आउँछन् ।’ प्रदेशकै राजधानी र अन्य ठाउँभन्दा विशेषज्ञ सुविधा पाउने भएकाले कास्कीमा धेरैले गर्भपतन गर्न आउने गरेको उनको भनाई छ ।
कास्कीमा असुरक्षित गर्भपतनको समस्या बढिरहेको अधिकारीले बताए । ‘११ प्रतिशत त २० वर्षमुनिका युवती नै हुने तथ्य फेला परेको छ । उनीहरुले गैरकानुनी स्वास्थ्य केन्द्रमा गएर गर्भपतन गर्ने गरेको बताए ।
गर्भपतन गर्ने अधिकांश वैवाहिक सम्बन्धमा भएकाहरु छन् यद्यपि परिवार नियोजनको साधनको प्रयोगबारे जानकारी नलिने र प्रयोग गर्न नखोज्ने कारणले महिलाहरु गर्भपतनको जोखिम लिन बाध्य भएको अधिकारी बताउँछन् ।
उनी भन्छन् । ‘परिवार नियोजनका साधनका प्रयोगबारे राम्रोसँग जानकारी लिन सक्ने हो भने गर्भपतन केहि कम गर्न सकिन्छ ’ त्यसै गरी छोराको आशमा छोरीको भ्रुण हत्या गर्नेहरुका कारणले पनि गर्भपतन बढेको उनको भनाई छ ।
गर्भपतन कम गर्नलाई महिला स्वयंमले आफ्नो प्रजनन् स्वास्थ्य अधिकारको बारेमा सचेत हुँदै परिवार नियोजनको साधनमा जोड दिनु पर्ने उनको तर्क छ ।
भर्खरै
लोकप्रिय
