पोखरा – आफ्नै छिमेकीबाट बलात्कारपछि हत्या गरिएकी कास्की पुम्दी भुम्दीकी–२२ की श्रीया सुनारको बुधबार दाहसंस्कार गरिएको छ।
बलात्कार आरोपितलाई अदालतले दोषी करार नगरेसम्म शव नबुझ्ने अडानमा बसेको श्रीयाको परिवारले न्याय दिलाउने प्रहरी प्रशासनको आश्वासनपछि बुधबार शव बुझेर दाहसंस्कार गरेको हो।
श्रीयाका ठुलाबुवा मीनबहादुर विकले घटनाका दोषीले आरोप स्वीकार गरिसकेकाले शव अस्पतालमा राखिरहन उचित नभएकाले शब बुझेर दाहसंस्कार गरिएको जानकारी दिए। विकले घटनाको सबै प्रमाण जुटिसकेका कारण शव बुझेको बताए।
जिल्ला प्रहरी कार्यालय कास्कीका प्रमुख एसपी ओमबहादुर राना र डिएसपी रवीन्द्रमान गुरुङसँग श्रीयाको आफन्तसँग छलफल भएको थियो।
उनीहरुले शवको दाहसंस्कार गरेपनि अनुसन्धानमा बाधा नपुग्ने बताएपछि आफन्तले शव बुझेका हुन्। श्रीयाको शव पोस्टमार्टम्पछि पोखरा स्वास्थ्य विज्ञान प्रतिष्ठानमा राखिएको थियो।
असोज ८ गते सोमबार साँझ बिस्कुट किन्न घरबाट निस्केकी १० वर्षीया श्रीयाको शव केहीपर खोल्सामा ९ गते बिहान भेटिएको थियो।
२७ वर्षका कुसुम पौडेलले बलात्कारपछि उनको हत्या गरेको स्वीकार गरिसकेका छन्। पौडेललाई प्रहरीले ९ गते बेलुका उनकै घरबाट पक्राउ गरेको थियो।
भर्खरै
लोकप्रिय
