बारा (फेटा) – भलुही गाउँ नजिकैको दुधौरा नदी किनारमा सोमबार बेलुका एकैटोली दुई चिता बनाइयो । एउटा चितामा सासु अर्कोमा बुहारी । पिता–पुत्रले जीवन संगिनी गुमाए । एक वर्ष र तीन वर्षका लालाबालाले आमाको काखको साथ सधैँका लागि गुमाए ।
आइतबार बेलुका अचानक आएको हावाहुरीले फेटा गाउँपालिका–१ भलुहीकी मतिसरी देवी र उनकी बुहारी रुना देवीको ज्यान लियो । मतिसरीका छोरा (रुनाका श्रीमान) भीम दास घरमै थिए । उनका पिता अर्थात मतिसरीका पति रामसुरत दास कामका लागि गोरखा थिए ।
श्रीमती र बुहारी गुमाएका रामसुरत दास । हावाहुरीका कारण मृत्यु भएका श्रीमती र बुहारीको उनले सोमबार बेलुका अन्तिम संस्कार गरेका छन् । तस्बिर : बर्षा शाह/देश सञ्चार
आइतबार नै रामसुरतलाई घटनाबारे थाहा भएको थियो, तर गाडी नपाएकाले घर पुग्न सकेनन् । सोमबार उनी हुरीले उडाएर बाँकी रहेको भग्नावशेष घरमा पुगे । श्रीमती र बुहारीको निधन भइसकेको थियो । छोरा भीम उनको अनुहारमा निन्याउरो परेर हेरिरहेका थिए ।
तीन वर्षकी नातिनी सन्ध्या र एक वर्षका नाति सन्जितको विजोग थियो, रामसुरतले मन थाम्न सकेनन् । र पनि श्रीमती तथा बुहारीको अन्तिम बिदाई गर्नु थियो । हावाले उडाएर बाँकी रहेका केही सामग्री जोरजाम गरेर अन्तिम बिदाईका लागि तयारी गरे ।
आमा र श्रीमती गुमाएका भीम दास एक वर्षका छोरालाई काखमा लिएर टोलाइरहेका थिए । तस्बिर : बर्षा शाह/देश सञ्चार
गाउँका २०–२५ जना जम्मा भएर नजिकैको दुधौरा नदीमा मतिसरी र रुनाको अन्तिम संस्कार भयो । छिप्पिँदै गरेको साँझमा उनीहरुको देह धुवाँ र खरानीमा परिणत भयो । हावामा मिल्दै गरेको मतिसरी र रुनाको देह हेर्दै रामसुरत र भीमले आँसु झारे अनि फर्किए, भत्किएको घर तिर ।
घरमा सन्ध्या र सन्जितको अवस्था देखेपछि मन थामिने अवस्था थिएन । रामसुरत र भीमले त जसोतसो मन थाम्लान्, तर सन्ध्या र सन्जितले भने आमा र हजुरआमा नै गुमाए । सन्जितले त एक वर्षमै आमाको दूधबाट विमुख हुनु परेको छ ।
भीमका छोरा सन्जितलाई उनकी भान्जीदिदीले फुलाउने प्रयास गर्दै थिइन् । तस्बिर : बर्षा शाह/देश सञ्चार
यो पनि पढ्नुहोस्
भर्खरै
लोकप्रिय
