झापा – नेपाली कांग्रेसका सभापति शेरबहादुर देउवाले अहिलेको सरकार अधिनायकवाद तर्फ उन्मुख भएको बताएका छन् । झापाको चन्द्रगढि विमानस्थलमा सोमबार पत्रकारसँग कुरा गर्दै कांग्रेस सभापति देउवाले सरकारका पछिल्ला गतिविधिले अधिनायकवादको संकेत गरेको बताएका हुन् ।
उनले भने, ‘यो सरकारले प्रेस स्वतन्त्रतामाथि अंकुश लगाउन खोजेको छ । सेना परिचालनको जिम्मा प्रधानमन्त्रीले लिने प्रयास तथा बालुवाटारको ललिता निवासको जग्गा प्रकरणले सरकारको अधिनायकवादी चरित्र देखाएको छ ।’
सभापति देउवाले नेकपाका नेता विष्णु पौडेलले किनेको भनेको सो जग्गा सुवर्ण शम्शेरको रहेको बताए । ललिता सुवर्णकी श्रीमती रहेको भन्दै उनले सरकारले अधिग्रहण गरेको जग्गा यदि कसैले पाउने भए सुवर्ण शम्शेरका नातिले पाउनु पर्ने बताए ।
यस्तै देउवाले कांग्रेस कमजोर नबनेको पनि दाबी गरेको छन् । प्रतिपक्षका रुपमा कांग्रेसको भूमिका कमजोर भएको भन्ने बारेमा प्रतिक्रिया दिँदै उनले भने, ‘चुनावमा भोट अरुलाई दिने अहिले आएर कांग्रेस कमजोर भयो भन्ने ? हामी कमजोर छैनौँ ।’
पार्टीका स्थानीय तहका समितिहरु सहमतिमै बनाउन आफू प्रयासरत रहेको पनि उनले बताए । यसका लागि आन्तरिक छलफल भइरहेको उनको भनाई छ ।
समिति बनाउँदा संक्रमणकालीन समिति बनाउने कि महाधिवेशनसम्म यत्तिकै जाने भन्नेबारे छलफल भइरहेको उनको भनाई छ ।
भर्खरै
लोकप्रिय
