सुर्खेत– नेपाली कांग्रेसका वरिष्ठ नेता रामचन्द्र पौडेलले वर्तमान केपी शर्मा ओली नेतृत्वको कम्यूनिष्ट सरकारले जनमतको दुरुपयोग गरेको आरोप लगाएका छन् ।
कांग्रसले थालेको जागरण अभियानका क्रममा अछामबाट काठमाडौँ जानेक्रममा सुर्खेतमा भएको कार्यकर्ता भेटघाटमा उनले वर्तमान सरकारले जनताको मतको कदर गर्न नसकेको आरोप लगाएका हुन् ।
‘कम्यूनिष्टहरु भन्दा आफू शोषक र उत्पीडनका विरुद्धमा भन्ने तर, बन्दा साशक बन्ने’ उनले भने, ‘जनतालाई निर्वाचनताका दिएका वाचाहरु वर्तमान सरकारले पूरा गर्न सकेको छैन् । आज नेपालमा पक्षपातको शासन चलिरहेको छ ।’
उनले संघीयता र संविधान विपरित सरकारले आफ्ना गतिविधि अगाडि बढाएको बताए । न्यायालय, संवैधानिक निकायमाथि हस्तक्षेप सरकारले गरिनुले केपी ओलीमा शासक बन्ने अभिप्राय देखिएको बताए । गाँउमा सिंहदरबारको प्रचार गरिएको भएपनि संघीयता चलाउन कम्यूनिष्ट असफल भएको बताए ।
‘जनताको आवश्यकता खानेपानी हो । सबै नदीनालाको पानी एकै ठाउँमा जम्मा गर्ने र भारतलाई बुझाउने यो कस्तो ओली राष्ट्रवाद हो ?’ उनले भने, ‘पानीजहाज तत्काल नेपाली जनताका लागि आवश्यक छैन ।’
उनले नेपाली काग्रेस भित्रको गुटबन्दी अन्त्य गरिएको सन्देश दिए । ‘म देउवा र पौडेलको भन्ने होइन्, अब म नेपाली कांग्रेस हुँ भन्नसक्नुपर्छ’ उनले भने, ‘स्वच्छ छवी, मुल्यांकन गर्न सक्ने क्षमता र सक्षम नेतृत्व कांग्रेसलाई आवश्यक हो ।’
वीरेन्द्रन्गरस्थित कांग्रेस पार्टी कार्यालयमा भएको कार्यक्रममा केन्द्रीय सदस्य हृदयराम थानी, जिल्ला सभापति कमलराज रेग्मीलगायत जिल्लाका नेता तथा कार्यकर्ताहरुको उपस्थिति थियो ।
भर्खरै
लोकप्रिय
