कर्णाली प्रदेशले छोरी जन्मिए मासिक पाँच सय दिने

सुर्खेत– कर्णाली प्रदेश सरकारले छोरी जन्मिएको अवसरमा बैंक खाता सञ्चालन गरिदिने भएको छ।

छोरीको लालनपालन र उच्च शिक्षाका लागि कर्णाली सरकारले आगामी आर्थिक वर्षदेखि सञ्चालन हुने गरी नयाँ कार्यक्रमका लागि बजेट विनियोजन गरेको हो।

छोरी जन्मिए लगतै प्रदेशले एक हजार रुपैयाँ बराबरको बैंक खाता सञ्चालन गरिदिने भएको छ। त्यस लगतै मासिक पाँच सय रुपैयाँका दरले छोरीको खातामा विवाह योग्य उमेरसम्म पैसा उपलव्ध गराउने कार्यक्रम प्रदेश सरकारले ल्याएको हो।

कर्णाली सरकारले ‘बैंक खाता छोरीकोः सुरक्षा जीवनभरीको’ कार्यक्रम सञ्चालन गर्ने भएको हो। जसका लागि सात करोड रुपैयाँ विनियोजन गरिएको छ। छोरीको जीवन सुरक्षामा सहयोग पुग्ने गरी प्रदेशले यो कार्यक्रम सञ्चालन गर्न लागेको हो।