झापा- काठमाडौंदेखि चिकित्सकको भेषमा आएका दुई युवकलाई इलाका प्रहरी कार्यालय काँकरभिट्टाको टोलीले आइतबार पक्राउ गरेको छ।
उनीहरु एउटा निजी कारमा काठमाडौंदेखि काँकरभिट्टासम्म आइपुगेको प्रहरीको भनाइ छ।
बाटोमा सुरक्षाकर्मीलाई नक्कली परिचयपत्र देखाउँदै र निःशुल्क स्वास्थ्य शिविर सञ्चालन गर्नका लागि हिँडेको भन्दै पूर्वीद्वार काँकरभिट्टा आइपुगेको जिल्ला प्रहरी कार्यालय झापाले जनाएको छ।
बा. ६ च ७०१९ नम्बरको कारमा उनीहरु झापा आइपुगेका हुन्। पक्राउ पर्नेमा ३३ वर्षीय दिलकुमार श्रेष्ठ र २८ वर्षीय गणेश अधिकारी रहेका छन्।
उनीहरु लागुपदार्थ दुर्व्यसनी हुनसक्ने प्रहरीको आशंका छ। जिल्ला प्रहरी कार्यालय झापाका प्रमुख प्रहरी उपरीक्षक कृष्ण कोइरालाले लक डाउनका बेला पनि लागु पदार्थ आपूर्तिका लागि उनीहरु काठमाडौंदेखि झापासम्म यात्राको जोखिम मोलेको हुनसक्ने बताए।
ती युवकलाई मेचीनगर नगरपालिकाले निर्माण गरेको क्वारेन्टाइनमा राखिएको छ भने कार प्रहरीको नियन्त्रणमा छ।
भर्खरै
लोकप्रिय
