काठमाडौँ– आफ्नो राजीनामाका लागि चर्को दबाब खेपिरहेका प्रधानमन्त्री एवं नेकपा अध्यक्ष केपी ओलीले नेता वामदेव गौतमलाई प्रधानमन्त्री बनाउने प्रस्ताव गरेर आफूविरुद्धको मोर्चालाई तितरबितर पार्न ‘टियर ग्यास’ छोडेको प्रतिक्रिया दिएका छन्।
शुक्रबार अर्का अध्यक्ष पुष्पकमल दाहाल प्रचण्डसँग बालुवाटारमा छलफल गर्ने क्रममा ओलीले त्यस्तो प्रतिक्रिया दिएका हुन्।
नेकपा स्रोतका अनुसार दाहालले नेता गौतमलाई प्रधानमन्त्री बनाउने प्रस्ताव कसरी कार्यान्वयन गर्नुहुन्छ भन्दै ओलीसमक्ष जिज्ञासा राखेका थिए।
जवाफमा प्रधानमन्त्री ओलीले गौतमलाई प्रधानमन्त्री बनाउने प्रस्ताव आफूविरुद्धको मोर्चालाई तितरबितर पार्न ‘टियर ग्यास’ छोडेको प्रतिक्रिया दिएका थिए।
दाहाललाई मनाउने प्रयास गरिरहेका ओलीले उनीसमक्ष आफू प्रधानमन्त्रीमा रहिरहने बरु अब पार्टीको नेतृत्व दाहाल एक्लैले गर्न सक्ने प्रस्ताव अघि सारेको बुझिएको छ।
त्यसबारे कुनै पनि प्रतिक्रिया नजनाई प्रचण्ड सोझै पार्टीका वरिष्ठ नेता माधवकुमार नेपालको निवास कोटेश्वर हानिएका थिए।
प्रधानमन्त्री ओलीले वैशाख १७ गतेको सचिवालय बैठकमा आफूले राजीनामा नदिने बरु कोरोना संकटपछि नेता गौतमलाई उपचुनाव लडाएर या गौतमलाई राष्ट्रियसभामा लगेर राष्ट्रियसभाका सदस्य पनि प्रधानमन्त्री बन्न पाउने गरी संविधान संशोधन गरेर प्रधानमन्त्री बनाउने प्रस्ताव गरेका थिए।
यस्तै ओलीले नेता नेपाललाई पार्टीको तेस्रो अध्यक्ष बन्न प्रस्ताव गरेकोमा नेता नेपालले त्यसलाई अस्वीकार गर्ने बताएका छन्।
भर्खरै
लोकप्रिय
