बुटवल-प्रदेश ५ का क्वारेन्टाइनमा रहेका ७ हजार ७ सय जनाको स्वाब प्रयोगशालामा थुप्रिएका छन्। सामाजिक विकास मन्त्रालका वरिष्ठ जनस्वास्थ्य प्रशासक डा. उमाशंकरप्रसाद चौधरीका अनुसार अहिले प्रदेश ५ मा दैनिक औसतमा तीन सय स्वाब परीक्षण हुने गरेको छ।
स्वाब धेरै र काम गर्ने उपकरण थोरै हुँदा अहिले प्रदेश ५ मा स्वाब संकलन भएको एकसातादेखि १० दिनमा मात्र रिपोर्ट आउँछ ।
प्रयोगशालामा अहिले स्वाब थुप्रिएका कारण कोरोना भाइरसको संक्रमणबाट मृत्यु भएकाको रिपोर्ट पनि ढिलो आइरहेकोले शव व्यवस्थापनमा समेत समस्या देखिएको छ ।
प्रयोगशालाबाट स्वाबको रिर्पोट ढिलो आउँदा क्वारेन्टाइनमा बसेका संक्रमित व्यक्तिहरुबाट अन्यमा संक्रमण फैलिने त्रास छ । भैरहवास्थित प्रदेश जनस्वास्थ्य प्रयोगशालाका निमित्त प्रमुुख डा. राजेन्द्रकुमार गिरीले भैरहवाको प्रयोगशालामा मात्रै एक हजार स्वाब थुप्रिएको जानकारी दिए।
‘हामीकहाँ अहिलेसम्म ५ हजार ८ सय २७ स्वाब आएकामध्ये ४ हजार २ सय ५० को रिपोर्ट नेगेटिभ, ४ सय ८८ स्वाबको रिपोर्ट पोजेटिभ र अझै एक हजार स्वाब परीक्षणको प्रक्रियामा छन्’–उनले भने ।
प्रदेश ५ को सामाजिक विकास मन्त्रालयका अनुसार शनिबारसम्म प्रदेशभरका प्रयोगशालामा ७ हजार ७ सय स्वाब परीक्षण गर्न बाँकी छ । दाङको प्रयोगशालामा ३ हजार ९ सय, भैरहवामा एक हजार, बाँकेमा एक हजार स्वाब परीक्षणको पर्खाइमा छन् ।
बाँकी स्वाब प्रदेश बाहिर पठाएर समेत रिपोर्ट ल्याउने गरिएको छ । केही स्वाब काठमाडौंको राष्ट्रिय जनस्वास्थ्य प्रयोगशाला, पोखरा र हेटौंडामा परीक्षणको लागि पठाइएको छ ।
प्रदेश ५ का क्वारेन्टिनमा शनिबारसम्म ९ हजार ६ सय ८५ जना रहेका छन् । यो संख्या निरन्तर बढिरहेको छ । आइसोलेसनमा ९ सय ६७ जना रहेका छन् । पहिलो संक्रमण वैशाख १९ गते रुपन्देही र बाँकेमा एकसाथ देखिएको प्रदेश ५ का १२ वटै जिल्लामा कोरोना संक्रमण फैलिइसकेको छ ।
परीक्षणको गति बढाउन थप पीसीआर मेशिन ल्याइदै
कोरोना भाइरस (कोभिड–१९) संक्रमण तीब्र भएर प्रयोगशालामा स्वाब थुप्रिएपछि प्रदेश सरकारले थप तीन वटा पिसिआर मेसिन ल्याउन लागेको छ ।
प्रदेशले भैरहवा, बुटवल र दाङमा तीन वटा पिसिआर मेसिन थपेर जाँच बढाउने तयारी गरेको वरिष्ठ जनस्वास्थ्य प्रशासक डा. चौधरीले बताए ।
अहिले रुपन्देहीको भैरहवा गहुँबालीस्थित प्रदेश जनस्वास्थ्य प्रयोगशाला, भेरी अस्पताल बाँके र दाङस्थित राप्ती स्वास्थ्य विज्ञान प्रतिष्ठानमा गरी तीन ठाउँबाट पिसीआर परीक्षण भइरहेको छ ।
डा.चौधरीले कोरोना भाइरसको संक्रमणको आशंका गरिएका व्यक्तिको स्वास्थ्य जाँचको अनुुपात बढाउन तीन वटा मेसिन ल्याउने प्रक्रिया अगाडि बढेको बताए। ‘तीन वटा मेसिनमध्ये लुम्बिनी प्रादेशिक अस्पताल बुटवलमा राख्ने मेसिन आइसकेको छ । अन्य दुुई वटा मेसिन आउने प्रक्रियामा छन् । तीमध्ये एउटा भैरहवाका जनस्वास्थ्य प्रयोगशालामा राखिने छ’–उनले भने–‘अर्को राप्ती अस्पताल दाङमा राखिने छ ।’ उनका अनुसार मेसिन थप भएपछि स्बाव परीक्षण
दैनिक ६ सम्म पुग्नेछ र स्वाब संकलन भएको ५–६ दिनमै रिपोर्ट आउनसक्नेछ।यी मेशिन ल्याएर एकहप्ताभित्रै काम थालिने उनले बताए । त्यसका लागि प्रदेश सरकारले आवश्यक संरचना, प्राविधिक जनशक्ति र मेशिनका लागि चाहिने सहायक सामग्रीहरु जुटाउन थालेको छ ।
प्रादेशिक अस्पतालमा जोडियो मेशिन
लुम्बिनी प्रादेशिक अस्पताल बुटवलमा पिसिआर मेसिन जडान गरिएको छ । अस्पतालका अध्यक्ष सुुर्यबहादुुर भट्टराईले प्रदेश सरकारको ६० लाख रुपैयाँ र अस्पताल विकास समितिको बाँकी रकम लगानी गरेर एक करोड ३० लाख रुपैयाँमा उपकरण ल्याइएको बताए । उनले एकहप्ताभित्रमा मेशिन सञ्चालनमा आउने बताए ।
अस्पतालमा उपचारका लागि आउने बिरामीहरुको परीक्षण नहुँदा चिकित्सक र अस्पतालमा कार्यरत अन्य कर्मचारीहरु जोखिममा परेपछि अस्पताल विकास समितिको पहलमा पिसिआर जाँच मेसिन ल्याइएको हो।
मेशिन जडान भएपछि अस्पतालको ओपिडीको ज्वरो क्लिनिकमा आउने बिरामीको समेत पिसिआर जाँच गरिने छ भने अस्पतालमा उपचारका लागि आउने अन्य रोगका बिरामीमा शंकास्पद लक्षण देखिएमा परीक्षण गरिनेछ।
भर्खरै
लोकप्रिय
