वीरगञ्ज– बारामा १४ वर्षका बालक प्रहरीको गोली लागेर घाइते भएको घटनाको छानबिन गर्न चार सदस्यीय छानबिन टोली गठन गरिएको छ।घटनाको छानबिनको लागि जिल्ला प्रशासन कार्यालयले चार सदस्यीय छानबिन टोली गठन गरेको हो।
जिल्ला प्रशासनका प्रशासकीय अधिकृत सुरेन्द्र प्रसाद यादवको संयाेजकत्वमा प्रहरी निरीक्षक सुरेन्द्र यादव, सशस्त्र प्रहरी निरीक्षक राजेश्वर साह र राष्ट्रिय अनुसन्धानका शोभाकान्त चौधरी सदस्य रहेको छानबिन समिति गठन गरिएको हो। समितिलाई घटनाको छानबिन गरी सात दिनभित्र प्रतिवेदन पेश गर्न भनिएको छ।
गत मंगलबार राति भारतबाट स्थानीयले तीन वटा मोटरसाइकलमा ल्याएको सात बोरा प्याज इलाका प्रहरी कार्यालय कवही गोठले नियन्त्रणमा लिएको थियो। सो क्रममा जिल्ला प्रहरी कार्यालयबाट गएको गाडीलाई रोकेर स्थानीयले ढुंगामुढा गरेका थिए। प्रहरीले स्थिति नियन्त्रणमा लिन १२ राउण्ड हवाई फायर गरेको थियो। सोही क्रममा प्रहरीको गोली लागेर स्थानीय सुवर्ण गाउँपालिका २ कवही गोठका १४ वर्षका बालक रञ्जन यादव गम्भीर घाइते भएका थिए।
उनको टाउकोमा गोली लागेको थियो। घाइते बालकको अहिले वीरगञ्जको नारायणी बयोद्धा अस्पतालमा उपचार भइरहेको छ। प्रहरीको गोली लागेर बालक घाइते भएको विरोधमा बिहीबार सदरमुकाम कलैयामा विरोध प्रदर्शनसमेत भएको थियो।
भर्खरै
लोकप्रिय
