काठमाडौँ- नेकपाका प्रवक्ता नारायणकाजी श्रेष्ठले राष्ट्रपति विद्यादेवी भण्डारीले मगंलबार जारी गरेको अध्यादेश तत्काल फिर्ता हुनुपर्ने माग गरेका छन्।
उनले सामाजिक सञ्जाल फेसबुकबाट आफ्नो निजी धारणा सार्वजनिक गर्र्दै अप्रत्यासित ढङ्गबाट अध्यादेश ल्याउनु गलत भएको बताएका हुन्। उनले भनेका छन्,‘ सरकारले पुनः संवैधानिक परिषद सम्बन्धी अध्यादेश जारी गरेको छ । यो सारतः यस अघि जारी गरेर फिर्ता गरिएकै अध्यादेश हो। त्यसबेला हाम्रो पार्टी ,प्रमुख प्रतिपक्ष लगायतका राजनीतिक पार्टीहरु र नागरिक समाजले अलोकतान्त्रिक कदम भन्दै बिरोध गरी फिर्ता लिन व्यापक दवाव दिएपछि सरकारले उक्त अध्यादेश फिर्ता लिएको थियो ।’
उनले थपेका छन्,‘अहिले सत्तारुढ हाम्रो पार्टीको स्थायी कमिटीको बैठक चलिरहेको छ र संसदको नियमित अधिवेशन बोलाउने समय नजीक आईसकेको छ। यस्तो स्थितिमा प्रधानमन्त्रीले अप्रत्यासित ढङ्गबाट अध्यादेश ल्याउनु गलत छ। तसर्थ अध्यादेश तत्काल फिर्ता लिनु पर्दछ ।’
यस्तै उनले अध्यादेश जारी गर्ने सम्बन्धमा पार्टीलाई कुनै जानाकारी नभएको र जारी गरिएपछि पार्टीमा कुनै छलफल नभएकोसमेत बताएका छन्। भोलिको स्थायी कमिटीको बैठकमा यसबारे छलफल होला भन्ने उनको भनाई छ।
भर्खरै
लोकप्रिय
