वीरगञ्ज– बारामा गाँजा तस्करी गर्ने समूह र प्रहरीबीच गोली हानाहान भएको छ। गोली हानाहानपछि प्रहरीले एकजनालाई नियन्त्रणमा लिएको छ।
प्रहरीले मकवानपुर हेटौँडा उपमहानगरपालिका वडा नम्बर ६ बस्ने ४७ वर्षीय इमान सिंह तामाङलाई गाँजासहित नियन्त्रणमा लिएको बाराका प्रहरी प्रवक्ता एवम् प्रहरी नायब उपरिक्षक गौतम मिश्रले जानकारी दिए।
इलाका प्रहरी कार्यालय निजगढ र अस्थायी प्रहरी पोष्ट रतनपुरबाट खटिएको प्रहरीको संयुक्त गस्ती टोलीले निजगढ नगरपालिका वडा नम्बर १३ स्थित भक्तलाल खोलाको बगरमा गाँजा ओसारपसार तथा खरिद बिक्री गरिरहेको देखेपछि प्रहरी र तस्करबीच गोली हानाहान भएको प्रहरीले जनाएको छ।
करिब ८/१० जनाको समूहमा रहेका उनीहरुले प्रहरी टोलीलाई देख्नासाथ प्रहरीलाई लक्षित गोली चलाएपछि प्रहरीले पनि प्रतिकार स्वरुप पाँच राउण्ड फायर गरेको प्रहरी नायब उपरीक्षक मिश्रले बताए।
गोली हानाहानपछि तस्कर समूहका तामाङलाई घटनास्थलबाट ५ वटा बोराभित्र लुकाइछिपाइ राखेको १ क्विन्टल २ किलो गाँजासहित नियन्त्रणमा लिएको थियो। उनको साथबाट लोड भएको एक थान भरुवा बन्दुक पनि बरामद गरिएको बारा प्रहरीले जनाएको छ।
नियन्त्रणमा रहेका तामाङलाई हातहतियार खरखजाना र लागूऔषध नियन्त्रण ऐन, २०३३ बमोजिम मुद्दा दर्ता गराइ अदालतबाट म्याद थप गरी अनुसन्धान भइरहेको जिल्ला प्रहरी कार्यालय बाराले जनाएको छ।
भर्खरै
लोकप्रिय
