
झापा – कोच राजवंशी समुदायले बुधबार ‘राष्ट्रिय भक्का दिवस’ एक कार्यक्रम गरि मनाएको छ।
सामाजिक संस्था कोचिला ग्राभुर फ्रन्ट केन्द्रीय समितिको आयोजनामा झापाको विर्तामोडमा बृहत् सांस्कृतिक कार्यक्रमसहित ‘राष्ट्रिय भक्का दिवस’ मनाइएको हो।
भक्का दिवस कार्यक्रम बिहान ८ बजेदेखि विर्तामोडको सिटी सेन्टर अगाडि भएको थियो। भाक्का कोच राजवंशी समुदायले चिसो (हिँउदे) मौसममा खाने प्रमुख परिकार हो।
पछिल्लो समय कोच राजवंशी समुदायसँगै अन्य जातजातीले पनि रुचाएपछि भक्का खाने चलन व्यापक बनेको छ ।
राजवंशी जातिमा मात्र सीमित रहेको भक्का खाने चलन सबै जातजातीबीच लोकप्रिय बनेपछि यसलाई प्रवर्द्धनात्मक कार्यक्रमसहित भक्का दिवस मनाउन थालिएको कोचिला ग्राभुर फ्रन्टका अध्यक्ष अभय राजवंशीले बताए।
भक्का चामलको पीठोबाट बनाइन्छ । शुद्ध चामलको पीठोलाई पानीको बाफमा पकाएर भाक्का बनाउने गरिन्छ । पीठोको चामलमा कुनै बस्तु मिसावट नहुने तथा पानीको बाफमा मात्र पकाउने गरेकाले भाक्का पूर्ण अर्ग्यानिक र स्वास्थ्यकर खाजाको रुपमा परिचित छ।
भाक्का दिवस कार्यक्रमलाई झापाका विभिन्न स्थानीय तह तथा संघ संस्थाले सहयोग गरेका छन्। दिवसमा पूर्व सांसद तथा प्रदेश १ का प्रदेश सभासदस्य तथा जिल्लास्थित सरकारी उच्च पदस्थ अधिकारीहरू सहभागी भएका थिए।