झापा – पूर्वका जिल्लाहरूमध्ये झापामा क्यान्सरका रोगी अत्यधिक बढ्दै गएको क्यान्सर रोगका विशेषज्ञहरूले बताएका छन्।
बिहीबार झापाको बिर्तामोडमा रहेको पूर्वाञ्चल क्यान्सर अस्पतालले २१ औं विश्व क्यान्सर दिवसको अवसर पारेर गरेको कार्यक्रममा प्रस्तुत गरिएको तथ्यांकले झापामा क्यान्सर रोगको अवस्था दिनानुदिन भयावह बन्दै गएको देखाएको छ।
क्यान्सर अस्पतालका मेडिकल डाइरेक्टर डा. विरेन्द्र यादवका अनुसार उक्त अस्पतालले जाँच गरेका क्यान्सर रोगीमध्ये सबभन्दा बढी महिलाहरूको स्तन क्यान्सर रहेको छ।
क्यान्सर रोग विशेषज्ञ डा. बिरेन्द्र यादव।
गत वर्षको तथ्यांकलाई हेर्ने हो भने पनि क्यान्सर रोगीको संख्या झापामा प्रदेश १ मै सबभन्दा बढी रहेको छ।
गत वर्ष झापामा १ हजार ४६२ जना क्यान्सरका बिरामी फेला परेको डा. यादवले बताए। त्यस्तै, दोस्रोमा मोरङमा ४३१, सुनसरीमा २९६, इलाममा २३६ र पाँचथरमा ८८ जना क्यान्सरका बिरामी फेला परेको यादवले बताए।
झापामा देखिएका नयाँ क्यान्सरका बिरामीमध्ये सबैभन्दा बढी स्तन क्यान्सरका १४९ जना रहेका छन्।
पाठेघरको मुखको क्यान्सर बिरामीको संख्या ८४ जना रहेको छ। समग्रमा फोक्सोको क्यान्सरबाट पीडित हुनेको संख्या १०७ रहेको डा. यादवले जानकारी दिए। नेपालमा १२ वटा सेन्टर र ३ वटा क्यान्सर हस्पिटलले सेवा दिइरहेको उनको भनाइ छ।
भर्खरै
लोकप्रिय
