सिमकोट – दक्षिणी क्षेत्रको ताँजाकोट गाउँपालिकामा बोलेरो जिप दुर्घटना हुँदा ४ जना घाइते भएका छन्। गाउँपालिका केन्द्र छप्रेलाबाट मैला गाउँ जाने क्रममा रोकिएको उक्त जिप अचानक गुड्दा दुर्घटना भएको हो।
शनिबार राति ११ बजे छप्रेलाबाट मैला गाउँमा जाने तयारी अवस्थामा रहेको र सडकमा रोकिएको बा १८ च ३९५१ नम्बरको बोलेरो जिप एक्कासि गुड्दा सडकको भित्तामा ठोकिएर पल्टिँदा चार जना घाइते भएको प्रहरी निरीक्षक सीताराम विष्टले जानकारी दिए।
दुर्घटनाबाट घाइते हुनेमा ताँजाकोट गाउँपालिका– ३ की १३ वर्षीया सरिता नेपाली, सोही वडाकी ७ वर्षीया गीता नेपाली, वडा नम्बर ५ का २७ वर्षका रवीन्द्र नेपाली र वडा नम्बर २ का ३६ वर्षका जानदत्त जैसी छन्।
घाइतेमध्ये सरिता बेहोस रहेको र उनको स्वास्थ्य चौकीमा सामान्य उपचारपछि बाजुरा जिल्लाको कोल्टीमा रिफर गरिएको छ। घाइते रवीन्द्रको टाउकामा चोट लागेको प्रहरीले जनाएको छ।
उनीहरू तीनै जनाको स्थानीय स्वास्थ्य चौकीमा उपचार भइरहेको प्रहरीले जनाएको छ।
भर्खरै
लोकप्रिय
