काठमाडौँ – सूचना तथा सञ्चार प्रविधि क्षेत्रको प्रतिष्ठित अवार्डका रूपमा स्थापित आइसिटी अवार्डको छैटौं संस्करणको अनलाइन नोमिनेसन आवेदन सुरु भएको छ।
लिभिङ विथ आइसिटीको आयोजना र विभिन्न सरकारी तथा निजी संस्थाहरूको सहकार्यमा आयोजना हुने ‘आइसिटी अवार्ड २०२१’ को लागि विभिन्न ११ विधामा अवार्डको नोमिनेसन खुला गरिएको छ।
दोस्रो लहरको कोभिड संक्रमण दर केही घटिरहेको अवस्थालाई ध्यानमा राख्दै गर्दै आइसिटी अवार्ड २०२१ को अनलाइन नोमिनेसन खुला गरिएको छ।
गत वर्ष पहिलो लहरको संक्रमणको अवधिमा अधिकांश कार्यक्रम स्थगन भए पनि आइसिटी अवार्ड २०२० भर्चुअल माध्यमबाट नोमिनेसन र छनोट प्रक्रिया अघि बढाउँदै डिसेम्बर २३, २०२० मा सोल्टी होटलमा विशेष कार्यक्रममार्फत १२ विधाका विजेतालाई सम्मान गरिएको थियो।
यस वर्षको आइसिटी अवार्डमा अधिकांश छनोट समितिका मिटिङ भर्चुअल सञ्चालन हुने आयोजकले जानकारी दिएको छ। आइसिटी अवार्डको छनोट प्रक्रियाका लागि दुई दर्जनभन्दा बढी जुरी र सल्लाहकारहरू रहेका छन्।
विभिन्न ११ विधामा इच्छुक व्यक्ति, कम्पनी, प्रडक्ट वा संस्थाहरूले २०७८ साउन १६ गतेसम्म आवेदन दिन सक्नेछन्। अवार्डमा प्रतिस्पर्धी आफैँ वा अन्य कसैले अनलाइन नोमिनेसन दर्ता गरिदिन सकिनेछ।
अवार्डमा नोमिनेसन गर्न आइसिटी अवार्ड डटओआरजी वेबसाइटमा गएर विधा छनोट गरी फारम भरेर बुझाउनुपर्नेछ। यस वर्ष गत वर्षझैँ विभिन्न ११ विधामा नोमिनेसन खुला गरिएको छ।
स्टार्टअप आइसिटी अवार्ड, प्रडक्ट आइसिटी अवार्ड, राइजिङ स्टार इन्नोभेसन आइसिटी अवार्ड गरी ३ विधा स्टार्टअप तथा प्रोजेक्टलाई अवार्ड गरिने विधा छन्।
व्यक्तिलाई प्रदान गरिने अवार्डमा पायोनियर आइसिटी अवार्ड, नेपाली डायस्पोरा आइसिटी अवार्ड, आन्टरप्रेनर आइसिटी अवार्ड र वुमन आइकन आइसिटी अवार्ड छन्।
यसैगरी, सरकारी तथा निजी संस्थालाई प्रदान गरिने अवार्डमा डिजिटल एजुकेसन आइसिटी अवार्ड (पब्लिक सेक्टर), डिजिटल एजुकेसन आइसिटी अवार्ड (प्राइभेट सेक्टर), डिजिटल गभर्नेन्स आइसिटी अवार्ड (पब्लिक सेक्टर) र डिजिटल सर्भिसेस आइसिटी अवार्ड (प्राइभेट सेक्टर) छन्।
सन् २०१६ देखि सुरु भएको आइसिटी अवार्डमा विभिन्न विधामा गरेर अहिलेसम्म ५० भन्दा बढी व्यक्ति, संस्था, कम्पनी तथा प्रडक्ट सम्मानित भइसकेका छन्।
अवार्डमा गत वर्षको ह्वावे आइसिटी अवार्ड २०२० मा ४०० सयभन्दा बढीको अनलाइन आवेदन प्राप्त भएको थियो।
यस वर्ष अवार्डको छनोट प्रक्रियालाई अझ व्यवस्थित र निष्पक्ष बनाउन १२ भन्दा बढीको जुरी समूहद्वारा ३ महिनासम्म विभिन्न चरणमा विजेताको छनोट गरिनेछ।
स्टार्टअप, प्रडक्ट, राइजिङ स्टार इन्नोभेसन विधामा ३ चरणको छनोट श्चात् उत्कृष्ट ५ घोषणा गर्दै पब्लिक भोटिङ सञ्चालन गरिनेछ। अन्य विधामा पनि विभिन्न ४ चरणका भर्चुअल छनोट र फिल्ड भिजिटसमेत सञ्चालन गरिनेछ।
भर्चुअल प्रेस कन्फ्रेन्स आयोजना गर्दै आयोजकले विभिन्न ११ विधाको लागि नोमिनेसन खुला गरेको हो। कन्फ्रेन्समा बोल्दै आयोजक समितिका संयोजक राजन लम्सालले हरेक वर्ष अवार्डलाई परिस्कृत गर्दै बृहत बनाउन लागिपरेको बताए।
भर्खरै
लोकप्रिय
