काठमाडौँ— राष्ट्रिय सरोकार तथा समन्वय समितिले कोभिड– १९ विरुद्धको खोपको सहज उपलब्धता नभएको भन्दै सरकारका सम्बन्धित अधिकारीसँग यस विषयमा सोधपुछ गर्ने भएको छ।
बुधबार बसेको समितिको बैठकले कोभिड–१९ विरुद्धको पहिलो मात्रा खोप लगाइसकेका व्यक्तिले पनि दोस्रो मात्रा खोप पाउन नसकेको र खोपको उपलब्धता हुन नसकेको भन्दै के कारणले यस्तो भएको भन्ने सम्बन्धमा सरकारसँग छलफल गर्ने निर्णय गरेको हो।
तत्कालै सरकारको प्रतिनिधिसँग यस सम्बन्धमा छलफल गरिने समिति सभापति दिलकुमारी रावल थापाले बताएका छन्।
साथै, समितिले कोभिड–१९ को नयाँ भेरियन्टको प्रभावको सम्बन्धमा पनि विज्ञहरूसँग छलफल गर्ने उनले जानकारी दिए।
यस्तै, समितिले विपदको सम्बन्धमा सरकारले गरेको पूर्वतयारी र विपदपछि प्रतिकार्यका लागि बनाएको योजनाको सम्बन्धमा पनि छलफल गर्ने भएको छ।
सिन्धुपाल्चोक बाढी पीडितलाई दाल, चामल बोकेर राहत दिन जानेको भीड बढेको र बाढी पीडितलाई दाल, चामल मात्रै आवश्यक नरहेको भन्दै समितिले तिनै तहको सरकारसँग अन्य विभिन्न आवश्यकताको सम्बन्धमा पनि छलफल गर्नुपर्ने निष्कर्ष निकालेको सभापति थापाले जानकारी दिएका छन्।
यस सम्बन्धमा पनि तीनै तहको सरकारको प्रतिनिधि ल्याएर छलफल गरिने सभापति रावलले जानकारी दिएका छन्।
=
भर्खरै
लोकप्रिय
