काठमाडौँ – काठमाडौंका प्रमुख जिल्ला अधिकारी कालीप्रसाद पराजुली र स्थानीय तहका प्रतिनिधिबीच सोमबार भएको बैठकले १ असोजबाट विद्यालय सञ्चालन गर्ने निर्णय गरेको छ।
स्वास्थ्य मापदण्ड पालना गरी विद्यालय सञ्चालन गर्ने निर्णय गरिएको प्रमुख जिल्ला अधिकारी पराजुलीले जानकारी दिए। स्थानीय तहहरूले आ–आफ्नो क्षेत्रको अवस्था हेरेर विद्यालय खोल्न सक्ने उनले बताए।
‘अब कोभिड–१९ को जोखिम कम भएका क्षेत्रमा स्थानीय तहले अभिभावकसँग समन्वय गरेर पठनपाठन सञ्चालन गर्न सक्नेछन्,’ उनले भने। प्रमुख जिल्ला अधिकारी र स्थानीय तहको शिक्षा समितिका प्रतिनिधिको बैठकले विद्यालय खोल्नुअघि शिक्षक र अभिभावकसँग छलफल गर्नुपर्ने निर्णय गरेको छ।
उनीहरूसँगको छलफलपछि कोभिड–१९ संक्रमणको अवस्था मूल्यांकन गरेर मात्रै विद्यालय खोल्ने वा नखोल्ने निर्णय गर्न सक्ने प्रमुख जिल्ला अधिकारी पराजुलीले बताए। कोभिड–१९ को दोस्रो लहर आएपछि १६ वैशाखबाट काठमाडौंमा निषेधाज्ञा जारी गरिएको थियो। त्यससँगै विद्यालय पनि बन्द भएका थिए।
भर्खरै
लोकप्रिय
