भारतको कमजोर ब्याटिङ, न्युजिल्यान्डलाई दियो १११ रनको लक्ष्य

काठमाडौँ – आईसिसी टी–२० विश्वकप क्रिकेटअन्तर्गत आफ्नो दोस्रो खेलमा अहिले न्युजिल्यान्डसँग खेलिरहेको भारतले एक सय ११ रनको लक्ष्य दिएको छ।

पहिला ब्याटिङ गरेको भारतले निर्धारित २० ओभरमा ७ विकेट गुमाएर एक सय १० रन मात्र जोड्न सक्यो।
भारतका लागि रवीन्द्र जडेजाले सर्वाधिक २६ रन बनाए।

हार्दिक पान्ड्याले २३, केएल राहुलले १८, रोहित शर्मा १४ र रिसभ पन्तले १२ रन बनाए। कप्तान विराट कोहलीले ९ रन मात्र जोड्न सके भने ओपनर इसान किसन पनि ४ रनमै आउट भए।

न्युजिल्यान्डका ट्रेन्ट बोल्टले ३, इस सोधीले २ तथा एडम मिल्ने र टिम साउथीले समान एक विकेट। बोल्टले चार ओभरमा केवल २० रन मात्र खर्चिए। दुवै टोलीको यो दोस्रो खेल हो। पहिलो खेलमा दुवै टोली पाकिस्तानसँग पराजित भएका थिए।