बुटवल – रुपन्देहीको तिलोत्तमा नगरपालिकामा एमालेका जनप्रतिनिधिको लगातारको विरोधका कारण आइतबारको नगर सभा बैठक स्थगित भएको छ।
आइतबार बोलाइएको बैठकमा पनि एमालेबाट निर्वाचित जनप्रतिनिधिले उपस्थिति पुस्तिकामा हस्ताक्षर नगरेपछि गणपुरक संख्या नपुगेको भन्दै सभा स्थगित भएको हो।
सभाहलमा उपस्थित भएर उपस्थिति पुस्तिकामा हस्ताक्षर नगरेपछि गणपुरक संख्या नपुगेको भन्दै नगरप्रमुख रामकृष्ण खाँणले शनिबार सभा स्थगित गरेका थिए।
आइतबार ९० सदस्यीय जनप्रतिनिधि रहेको सभामा ४२ जनाले मात्रै उपस्थिति पुस्तिकामा हस्ताक्षर गरेका थिए।
नगरप्रमुखले सभा स्थगित गरेपछि उपप्रमुख जागेश्वरीदेवी चौधरीको नेतृत्वमा एमालेबाट निर्वाचित जनप्रतिनिधिले नगर प्रमुखको विरुद्धमा नाराबाजी गरेका छन्। उपप्रमुखको नेतृत्वमा नगर प्रमुख खाँण र प्रमुख प्रशासकीय अधिकृत जीवन ज्ञवालीलाई अमर्यादित शब्द बोल्दै घेराउ गरेर आक्रमण प्रयास गरेपछि प्रहरीले सुरक्षा दिएको छ।
तिलोत्तमामा नगर प्रमुख र १७ मध्ये ९ वडाध्यक्ष जितेको काङ्ग्रेस नगर कार्यपालिका र नगर सभामा अल्पमतमा छ। एमाले उपप्रमुख र ८ वडा अध्यक्षसहित नगरसभाको ४८ पद जितेर बहुमतमा छ। पटक–पटक विवादका कारण नगर सभा स्थगित हुँदा तिलोत्तमाको बजेट पारित हुन सकेको छैन।
उपप्रमुखको नेतृत्वमा रहने न्यायिक समितिमा एकलौटी नगरी कांग्रेसबाट निर्वाचित जनप्रतिनिधिलाई पनि समावेश गराउनुपर्ने प्रस्ताव राखेपछि उपप्रमुख चौधरीले नगर सभा बैठक सञ्चालनमा अवरोध गर्दै आएकी छन्।
यसअघि असार ३१ गते नगरसभाको बजेट पारित गर्ने तयारीका साथ बसेको बैठकमा उपप्रमुख चौधरी सभामा उपस्थित भए पनि मञ्चमा नगइ विरोध गरेपछि बैठक स्थगित भएको थियो। नगरसभा सोमबार बस्ने गरी बोलाइएको छ।
भर्खरै
लोकप्रिय
