वीरगञ्ज – बारामा भएका छुट्टाछुट्टै सवारी दुर्घटनामा दुई जनाको मृत्यु भएको छ भने दुई जना घाइते भएका छन्।
बाराको जितपुर सिमरा उपमहानगरपालिका–२ मा जितपुरबाट पथलैयातर्फ जाँदै गरेको ना २० प ७१६४ नम्बरको मोटर साइकललाई ना ७ ख ४२३७ नम्बरको ट्रेलरले ठक्कर दिँदा मोटरसाइकल चालकको मृत्यु भएको हो।
ट्रेलरको ठक्करबाट मोटरसाइकल चालक जितपुर सिमरा–१ बस्ने २४ वर्षका मनोज मल्लिकको मृत्यु भएको प्रहरीले जनाएको छ। ट्रेलरको ठक्करबाट घाइते भएका उनको बुधबार राति साढे ११ बजे ज्यान गएको हो। ठक्कर दिने ट्रेलर र चालक बाराको परवानीपुर गाउँपालिका–३ बस्ने सर्फु आलमलाई प्रहरीले पक्राउ गरेको छ।
यस्तै, जितपुर सिमरा–१६ पसाहा पुलनजिकै ग २ च ४४१३ नम्बरको स्कार्पियो जिपले दुई जना सवार साइकल र प्र–२–०३–००२ प ४५८७ नम्बरको मोटरसाइकललाई ठक्कर दिँदा एक जनाको मृत्यु भएको छ भने दुई जना घाइते भएका छन्।
स्कार्पियोको ठक्करबाट मोटरसाइकल चालक सोही स्थान बस्ने ४० वर्षका राजेन्द्र माझीको उपचारको क्रममा सिमराको अल्पाइन अस्पतालमा मृत्यु भएको प्रहरीले जनाएको छ।
दुर्घटनामा साइकलमा सवार सोही स्थानकी २८ वर्षीया रुपा आले र २९ वर्षीया सोनिया योन्जन घाइते भएको बाराका प्रहरी प्रवक्ता राजेश थापाले जानकारी दिए।
भर्खरै
लोकप्रिय
