वीरगञ्ज – वीरगञ्ज महानगरपालिकाको सिर्सिया नदीमा फाेहोर पानी मिसाउने उद्योगलाई कारबाही गरिने भएको छ।
नदी सफा र व्यवस्थित गर्नेबारे वीरगञ्ज महानगरपालिकाका उपप्रमुख इम्तियाज आलम र बाराको जितपुर सिमरा उपमहानगर प्रमुख राजन पौडेलबीच छलफल भएको छ।
छलफलमा उद्योगले निर्देशन पालना नगरे कारबाही गर्नेबारे छलफल भएको थियो। वीरगञ्ज पथलैया औद्योगिक कोरिडोरअन्तर्गत पर्सा र बाराका दर्जनभन्दा बढी उद्योगले सिर्सिया नदीमा सीधै फोहोर पानी मिसाउने गरेकाले नदी दशकौँदेखि प्रदूषणको सिकार बनेको छ।
नदी सफा गर्न वीरगञ्ज महानगरले उपप्र्रमुख अनुगमन समिति नै बनाएर सफाइ अभियान चलाएको छ।
सोही अभियानअन्तर्गत नदीमा पर्सा र बाराका उद्योगले फाल्दै आएको फोहोर फाल्न नदिन तथा उद्योगबाट निस्किने फोहोर पानी प्रशोधन गरेर मात्र नदीमा मिसाउन उद्योगलाई चेतावनी दिनेबारे छलफल भएको थियो।
छलफलमा वीरगञ्ज महानगर उपप्रमुख एवं सिर्सिया नदी सरसफाइ अभियानका संयोजक इम्तियाज आलम जितपुर सिमरा उपमहानगर प्रमुख राजन पौडेल, उपप्रमुख भोला अधिकारी, नापी कार्यालय पर्साका प्रमुख नारायण श्रेष्ठ, नारायणी सिँचाइका डिभिजन इञ्जिनियर अकलाख सिद्धिकी, वीरगञ्ज उद्योग वाणिज्य संघका वरिष्ठ उपाध्यक्ष अनिल अग्रवाल, इलाका प्रहरी कार्यालय सिमराका प्रहरी नायव उपरीक्षक युवराज तिमल्सिना, वीरगंज महानगरका वन तथा वातावरण महाशाखा प्रमुख देवेन्द्र चौधरी, वातावरण निरीक्षक प्रदिप साहलगायत सहभागी थिए।
भर्खरै
लोकप्रिय
