काठमाडौँ – सरकारले कोरोनाविरुद्धको १५ लाख बुस्टर डोज खोप ५५ वर्षमाथिको उमेरसमूह, प्रतिरोधात्मक क्षमता कम भएका व्यक्ति, ज्येष्ठ नागरिक र अग्रपंक्तिमा खटिनेहरूलाई लगाउने भएको छ।
गत सोमवार कोरोना भाइरस संक्रममणविरुद्धको अतिरिक्त मात्रा (बुस्टर डोज) का लागि थप खोप नेपाल आएको थियो। ‘खोपका लागि ग्लोबल एलायन्स’ (गाभी) ले कोभ्याक्समार्फत जर्मन सरकारले उपलब्ध गराएको खोप नेपाललाई उपलब्ध गराएको थियो।
स्वास्थ्य तथा जनसंख्या मन्त्रालयका सहायक प्रवक्ता डा.समीरकुमार अधिकारीले पछिल्लो समय कोभिड १९ विरुद्धको १५ लाख डोज खोप उपलब्ध भएको र प्राथमिकताका आधारमा लगाउने कार्य सुरु गरिएको बताए। उनले पहिलो मात्रा खोप नलगाएको व्यक्तिहरुलाई पहिलो प्राथमिकतामा राख्ने र बुस्टर डोज लगाउन बाँकी नागरिकलाई प्राथमिकताका आधारमा खोप लगाउने व्यवस्था मिलाएको बताए।
सहायक प्रवक्ता अधिकारीले सम्बन्धित खोप केन्द्रमा उपलब्ध हुनेगरी समन्वय गरिसकेको उल्लेख गर्र्दै खोप उपलब्ध भइसकेको खोप केन्द्रबाट खोप सञ्चालन हुने गरी काम सुरु भइसकेको जानकारी दिए। उनले नागरिकले आफ्नो परिचय खुल्ने कागजात लिएर खोपकेन्द्र गए सहजै खोप लगाउन सक्ने बताए।
उनले खोप लगाउन बाँकी र बुस्टर डोज लगाउन बाँकी नागरिकलाई खोप लगाइदिन आग्रहसमेत गरे। आजबाट काठमाडौंको टेकुस्थित शुक्रराज ट्रपिकल तथा सरुवा रोग अस्पतालमा फाइजरको बुस्टर डोज लगाउन सुरु गरिएको छ।
सहायक प्रवक्ता अधिकारीले अहिले नेपालमा आएको कोरोनाविरुद्धको खोप पहिला भएको संक्रमण र अहिले फैलिरहेको संक्रमण दुवैको हिसावले प्रयोग गर्न मिल्ने बताए। उनले यो खोप विगतमा जुनसुकै खोप लगाएको भए पनि बुस्टर मात्राका रुपमा लगाउन मिल्ने बताए।
भर्खरै
लोकप्रिय
