हुम्ला– हुम्लाको सदरमुकाम सिमकोटमा बृहत् एकीकृत स्वास्थ्य शिविर सुरु भएको छ। बिहीबारबाट सुरु भएको शिविरमा मुटुरोग, प्रसूति तथा स्त्रीरोग, जनरल फिजिसियन, हाडजोर्नी, नशा, नाक, कान तथा घाँटी, बाल रोग,अकुपञ्चरलगायत उपचार भइरहेको छ।
शिविरका लागि ६ जना विशेषज्ञ चिकित्सक बिहीबार बिहान काठमाडौँबाट आइपुगेका हुन्।
जिल्ला स्वास्थ्य सेवा कार्यालयका प्रमुख प्रेमबहादुर सिंहका अनुसार जिल्ला अस्पतालका चिकित्सकसमेत शिविरमा काम गरिरहेका छन्।
प्रारम्भ सामाजिक संस्था र सिंगापुर रेडक्रसको आर्थिक तथा प्राविधिक सहयोगमा सिमकोट, नाम्खा, खार्पुनाथ गाउँपालिका र स्वास्थ्य सेवा कार्यालयले शिविर आयोजना गरेका हुन्। सहकार्य आधार विकास नेपाल र अठोट नेपालको रहेको छ।
शिविरको पहिलो दिन ८९४ बिरामीले सेवा लिएका छन् । जसमा ४९४ जना महिला र ३५५ जना पुरुष छन् । कोरोनापछिको सञ्चालन गरिएको यो पहिलो शिविर हो । शिविर ३ दिनसम्म सञ्चालन हुनेछ ।
भर्खरै
लोकप्रिय
