झापा – झापाको बिर्तामोड नगरपालिका वडा नं. ५ का वडाअध्यक्ष रोहित प्रसाईले वडा सचिवविरुद्ध आन्दोलन शुरु गरेका छन्।
वडासचिव समयमा नआएको र सेवाग्राहीको काम समयमा नगरेकाले वडाध्यक्ष प्रसाईंले मंगलबारदेखि नगरपालिका कार्यालयमै आफ्नो टेबल राखेर धर्ना दिएका छन्।
वडाध्यक्षले गर्ने काम नगरपालिकाको आँगनमा बसेरै प्रसाईंले गरिरहेका छन्। वडासचिव विमल पोखरेलले समय अनुशासन पालना नगरेको प्रसाईंको भनाइ छ।
पोखरेल कहिल्यै पनि बिहान कार्यालय समय १० बजे उपस्थित नभएको र ८ घण्टा काम नगरेको वडाध्यक्ष प्रसाईंले बताए। प्रसाईंले भने, ‘काम नगरेको समयको तलब कटौती गरेर नगरको खातामा जम्मा नगरेसम्म नगर परिसरबाटै सेवा दिन्छु।’
वडासचिव पोखरेलले भने समयको पालना गरेको दाबी गरेका छन्। तर वडाध्यक्ष प्रसाईंले भने उनको हाजिरीसँगै राखेर नगरपालिकामा धर्ना दिएका हुन्।
नगरपालिकाका निमित्त प्रमुख प्रशासकीय अधिकृत तिलचन भण्डारीले अहिले यो विषय छानबिनकै क्रममा रहेको बताए। उनले भने, ‘हामीले यो विषयलाई गम्भीरतापूर्वक लिएका छौँ। कर्मचारीले गलत गरेका रहेछन् भने उनीमाथि कारबाही हुन्छ।’
भर्खरै
लोकप्रिय
