झापा – पूर्वी नेपाल त्यस्मा पनि झापा भारतबाट आयात गरिने तरकारी तथा फलफूलमा निर्भर छ । आन्तरिक उत्पादनले बजारको माग धान्न सकिरहेको अवस्था छैन ।
भारतबाट आयात गरिने तरकारी तथा आन्तरिक उत्पादनमा बालीमा लगाउने विषादीको अवशेष कति छ भनेर नाप्ने प्रयोगशाला अहिले बन्द अवस्थामा छ । प्रयोगशाला बन्द भएपछि भारतबाट आयात गरिएका तथा आन्तरिक कृषि उत्पाद सोझै सर्वसाधारणका भान्सामा पुग्ने गरेको छ ।
कृषि तथा पशुपंक्षी विकास मन्त्रालयले अहिले प्रयोगशाला सञ्चालनका लागि कुनै पनि खर्च नपठाएपछि गत आइतबारदेखि प्रयोगशालामा तरकारीमा विषादी जाँच हुन सकिरहेको छैन ।
बिहीबार दिउँसो प्रयोगशालामा पुग्दा संघीय मन्त्रालयले खटाएका दुई जना कर्मचारी प्रयोगशालामा थिएनन् । बिर्तामोड नगरपालिकाले खटाएका दुई जना कर्मचारी कामबिहीन अवस्थामा प्रयोगशालामा बसेका थिए ।
बिर्तामोडको कृषि थोक बजार झापाको सबैभन्दा ठूलो र नेपाल सरकारले मुलुकका ११ स्थानमा सञ्चालन गरिरहेको क्षेत्रफलका हिसाबले सबैभन्दा ठूलो कृषि बजार हो ।
यहाँ भारतबाट आयातित तरकारी र फलफूल ल्याउने गरिएको छ भने पहाडी जिल्लाहरु इलाम, पाँचथर र ताप्लेजुङमा उत्पादित सागसब्जी र फलफूल विक्रीका लागि किसान र व्यापारीले सोझै ल्याउने गरेका छन् ।
कृषि मन्त्रालय अन्तर्गत सञ्चालित उक्त विषादी अवशेष द्रुत विश्लेषण प्रयोगशाला इकाईका कर्मचारीले आर्थिक अभाव देखाउँदै गत आइतबारदेखि सेवा बन्द भएको कृषि बजार व्यवस्थापन समितिका अध्यक्ष कमल पौडेलले जानकारी दिए ।
उनले भने, ‘यो प्रयोगशाला बन्द भएपछि मात्र मैले थाहा पाएँ । मैले पनि कृषि विभागमा पत्र लेखेको छु । यो कुनै पनि हालतमा बन्द हुनु हुँदैन । कुन कृषि बस्तु खान योग्य भन्ने कुराको निर्क्योल हुनुपर्छ । जनताको स्वास्थ्यमाथि खेलबाड गर्न पाइँदैन ।’
उक्त प्रयोगशाला हरिबोल गजुरेल कृषि मन्त्री रहेका बेला बिर्तामोडमा स्थापना गरिएको थियो । प्रदेश १ मा एउटा मात्र बिषादी अवशेष मापन प्रयोगशाला भएकोमा त्यो पनि बन्द भएकोमा विषादीसहितका तरकारी तथा फलफूल खाइएला भन्ने सर्वसाधारणको चिन्ता छ ।
भर्खरै
लोकप्रिय
