झापा – प्रतिनिधि सभाका सभामुख देवराज घिमिरेले संघीय संसदको प्रभावकारिताबारे प्रश्न उठन थालेको बताएका छन् ।
झापाको बिर्तामोडमा शनिवार आयोजित संसदको प्रभावकारिता सम्बन्धी अन्तर्क्रिया कार्यक्रममा बोल्दै सभामुख घिमिरेले संसदको प्रभावकारिताबारे प्रश्न उठ्न थालेपछि देशभर अन्तर्क्रिया कार्यक्रम सञ्चालन गर्न शुरु गरिएको बताए ।
उनले भने, ‘हामी वेस्ट मिन्स्टर प्रणाली अन्तर्गत संसदीय अभ्यास गरिरहेका छौं । बेलायतमा जे परम्परा छन् हामी त्यसैलाई आधार मानेर संसद चलाइरहेका छौं । त्यो परम्परागत भयो र परिवर्तनलाई संस्थागत गर्न प्रभावकारी हुन सकेन भन्ने कुराहरू आइरहेका छन् ।’
बेलायती अभ्यासले बहुमत र अल्पमतको मात्र भूमिका भएको भन्दै प्रश्न उठिरहेको उनले बताए । सही कुराहरूले स्थान नपाउने स्थिति पनि नेपालको संसदीय अभ्यासमा महसुस गर्न थालिएको सभामुख घिमिरेले बताए ।
संसदका काम कारबाहीलाई प्रभावकारी बनाउन अन्तर्क्रिया कार्यक्रममा आफू जुटिरहेको सभामुख घिमिरेले बताए ।
अन्तर्क्रिया कार्यक्रममा स्थानीय राजनीतिक दलका प्रतिनिधि, जनप्रतिनिधि, संघ/संस्थाका प्रतिनिधिले संसदका कुर्सी खाली हुने, संसदले दिएको निर्देशन सरकारले पालना नगर्ने, कानून निर्माणमा ध्यान नदिएका जस्ता गुनासा राखेका थिए ।
भर्खरै
लोकप्रिय
